Hadia Kualidade Edukasaun Certame Importante ba Estudante

Presidente Ezekutivu Fundasaun Cristal Agostinho dos Santos Gonçalves, rekonese hadi’a kualidade edukasaun iha Timor – Leste, kompetisaun certame importante ba estudante sira, tanba certame hanesan biban di’ak ba alunus feto – mane, bele hatudu avilidade ligasaun ho materia hotu, ne’ebé aprende ona iha sala laran, durante prosesu apredizajen.

“Instituisaun Educativa Cristal kada tinan realiza kompetisaun certame intra eskolar, hodi envolve estudante husi nivel 1⁰, 2⁰ Ciclo, nivel 3⁰Ciclo, inklui ba ensinu sekundariu, ida ne’e, la’os de’it buka manan ou lakon, maibé hakarak hadi’a kualidade edukasaun Timoroan sira nian”, kestaun ne’e, hato’o husi presidente ezekutivu, liuhosi nia palestra iha okaziaun hala’o enseramentu ba kompetisaun certame intra eskola tinan 2022, ne’ebé  hala’o iha salaun enkontru Cristal – Balide, Dili, sabádu (04/06).

Dirijente ne’e promete mós katak, iha tinan oin mai (2023), Fundasaun Cristal no Instituisaun edukativa Cristal, sei konvida mós eskola sira iha Dili, ne’ebe durante ne’e, seidauk hetan oportunidade hodi partisipa iha kompetisaun certame.

“Primeiru agradese ba eskola sira hotu, tantu privadu no públiku hotu iha DIli laran, ne’ebé partisipa ona iha kompetisaun ida ne’e. Ba tinan tuir mai, ita sei envolve mós eskola ne’ebé seidauk tuir certame ne’e. Tanba ne’e, sei kria mós, mekanismu ida di’ak, mais tekniku, hodi envolve peritu sira iha area juri, observadores, elavorasaun Pontus, nune’e bele haree konaba ba realizasaun certame ida ne’ebé justu, independente, nune’e lori rezultadu ida di’ak ba eskola hotu.” Presidente Fundasaun promete.  

Manan na’in sira iha certama intra eskolar tinan 2022

Nivel 1⁰, 2⁰ ciclo/ Ensinu Primária

1. Eskola Primária Cristal, okupa 1⁰ lugar
2. Eskola Sta. Madalena de Canossa, okupa 2⁰ lugar
3. Eskola esperança da Patria, okupa  3⁰ lugar
4. Eskola Primária  São Carlos, okupa 4⁰ lugar

Nivel Ensinu Básiku 3⁰ ciclo

1. Eskola terseiru ciclo Cristal, okupa 1⁰ lugar
2. Eskola Sta. Madalena de Canossa, okupa 2⁰ lugar
3. Eskola  São Carlos, okupa 3⁰ lugar

Nivel Ensinu Sekundáriu

1. Eskola Sekundaria  Cristal, okupa 1⁰ lugar
2. Eskola São Pedro, Grupu C,  okupa 2⁰ lugar
3. Eskola São José Operário  3⁰ lugar
4. Eskola São Pedro, grupu B, 4⁰ lugar

Tuir Informasaun ne’ebé Jornalista Time Timor asesu, ligasaun ho eventu ne’e, eskola sira hotu ne’ebé tama iha fase final, husi nivel primária no ensinu sekundária, kada grupu ida – idak hetan primeiu, maibé ba primeira klasifikasaun to’o kuarta klasifikasaun, hetan valor ne’ebé lahanesan.

Enkuantu konaba taza rotativa nivel ensinu sekundária tinan kotuk iha eskola São José Operario, ba tinan ida ne’e, iha fali eskola Cristal, ne’ebé hanesan uma Na’in certame nian. *****(TTM)