Segunda (06/06) loraik, mais ou menus tuku lima, liu minutu 10, Reitor Instituto Superior Cristal (ISC), Dr. Sebastião Pereira, inklui Fundadores Fundasaun Cristal, ne’ebé reprezenta husi Presidente Ezekutivu Fundasaun Cristal Agostinho dos Santos Gonçalves, padre kapelaun Cristal Manuel Pinto, SDB hamutuk ho Bispu Metropolitano aquidiocese Dili, Dom Virgilio do Carmo da Silva, SDB, inaugura ona Edifisiu foun ho andar tolu ba estudante Instituto Superior Cristal.
Edifisiu ne’e, kompostu husi sala hamutuk sanulu resin neen, iha ne’ebé sala sanulu resin lima, uza ba iha prosesu ensinu nian, sala ida, utiliza nu’udar laboratóriu ba departamentu Siensia Saúde, hodi hala’o atividade pratika (Klinika).
Lokasaun ba edifisiu foun ne’e, hamri’ik kedas iha resintu Instituisaun Edukativa Cristal, suku Mascarinha, Balide – Alto, Dili Timor – Leste.
Presidente Ezekutivu Fundasaun Cristal Agostinho dos Santos Gonçalves, dehan prosesu konstrusaun no hatu’ur fatuk dahulu nian, hahú iha tinan 2018, maibé depois ida ne’e, tanba Covid – 19, konstrusaun atraza ituan, no grasa Maromak nian, konsege inaugura duni iha fulan Juñu tinan 2022, iha ne’ebé Instituisaun Edukativa Cristal no Fundasaun Cristal kompleta ona nia ezistensia ba dala 38, (05/06/1984 – 05/06/2022).
“Loron 5 fulan Juñu ne’e, Fundasaun Cristal, Instituisaun Edukativa Cristal, kompleta ona nia ezistensia ba dala 38. Ho inaugurasaun ne’ebé hala’o husi Bispu Diocese Dili, hanesan grasa no momentu istoriku tebes, ba Instituisaun Edukativa Cristal”, lian Presidente ezekutivu liuhosi nia palestra iha Salaun Futsal Cristal – Balide, Dili hafoin misa aksaun grasa ne’ebé hala’o husi Bispu Metropolitano aquidiocese Dili, Dom Virgilio do Carmo da Silva, SDB hodi komemora eventu sira hanesan loron aniversáriu restaurasaun RDTL ba dala 20, Loron Maria Auxiliadora, Sarani sira nia tulun(24 de Maiu), inklui selebra Ezitensia Fundasaun Cristal/Instituisaun Edukativa Cristal ba dala 38.
Fatin hanesan Dom Virgilio do Carmo da Silva, SDB rekoñese, tinan 38 liu ba, Instituisaun Edukativa Cristal/Fundasaun Cristal kontribui maka’as tebes, la’ós parte edukasaun de’it maibé iha parte evanzelijasaun ninian mos.
“Tinan 38 ba kotuk Instituisaun Edukativa ida ne’e, halo buat barak liu produs rekursu umanu rihun neen nulu. Fiar katak ho progresu inklui aumenta tan ona edifisiu foun ne’ebé inaugura ona, liuhosi edukador sira tomak, sei tulun foin sa’e sira nu’udar futuru ba Nasaun ida ne’e, bele sai matenek, iha tempu sira ne’ebé mai”, palestra husi Dom Virgilio hanesan esperansa.
Parte ida, Bispo Diocese Dili ne’e, durante nia omilia esplika ba estudante Cristal sira dehan, matenek, ksolok, hetan grasa sira, hasai grau edukasaun ne’ebé ass, sira ne’e hotu, alende mai husi ema nia esforsu, nu’udar mós, kbi’it, grasa ispiritu santu ninian, iha ema hotu nia moris.
“Ita nia Sakrefisiu, susesu, ida ne’e mai husi Maromak. Nu’udar sarani, labele de’it reza, bainhira sei moris susar. Susesu ona, dala barak haluha Maromak, labele. Presiza nafatin buka sai nu’udar ema di’ak, haraik aan, no sai sarani ne’ebé di’ak”. Hato’o husi amu bispo ba estudante sira iha Cristal.
Enkuantu Vice Reitor ISC, Jacinto de Oliveira Junior dehan, ho edifisiu andar tolu ne’ebé Fundasaun Cristal no Institusaun Edukativa Cristal hari’i, sei bele dezenvolve di’ak liu tan setor edukasaun la’o diak iha País ida ne’e.
“Hanesan Instituisaun Ensinu Superior privada, esforsu ne’ebé durante ne’e halo, ho objetivu prinsipal ida hakarak produs rekursu umanu ba Timor – Leste. Konaba orsamentu ne’ebé gasta ba konstrusaun ne’e, hamutuk millaun ida resin. Ba oin sei hari’i tan edifisiu balu tuir planu ne’ebe mak iha”. Vice reitor haktuir ba jornalista sira, liuhosi entrevista badak iha edifisiu foun andar tolu, ISC – Balide. *****(TTM)
Discussion about this post