Cristal Selebra Misa Hodi Loke Tinan Eskolar 2023

Instituisaun Edukativa Cristal, liuhusi amu kapelaun Cristal Pe. Manuel Pinto, SDB realiza misa hamutuk ho familia bot Instituisaun Edukativa Cristal, Fundadores Fundasaun Cristal, hodi  loke tinan eskolar foun & tinan akademiku 2023.  Atividade liturgia ne’e, hala’o iha salaun enkontru Cristal Balide Dili, sesta(06/01).

Entretantu durante esplikasaun iha omilia santu, amu selebrante rekoñese, ho tinan eskolar foun no tinan akademiku ba 2023, lori esperansa foun ba parte hotu iha Fundasaun Cristal no Instituisun Edukativa, liu –liu hanesan estudante no manorin nain sira,  ida – idak hatene nia dever   no obrigasaun.

“Primeiru atu to’o ba  ita nia esperansa(Kualidade, energia foun, planu ne’ebé bot ho susesu), ema ida – idak  tenke koñese ita nia aan. Signifika katak estudante no manorin nain sira tenke hala’o knar, dever, ho responsabilidade. Maibé  atu alkansa asuntu sira ne’e, presiza haree fali frakeza, eru sira, la’ós de’it asuntu pozitivu, nune’e to’o ba ita nia gloria final”, lian motivasaun husi amu kapelaun Cristal iha misa abertura tinan eskolar 2023.

Antes termina kapelaun Cristal ne’e, husu ba familia salesiano/a atu sai fermento ne’ebé di’ak iha familia, sociedade no Nasaun. “Labele diminui sabedoria, karizma domin, harai’ik aan. Tenke Sai fermento liu –liu habot domin ba maun – alin, perdua malu, hadomi malu, no sai sarani ne’ebé loos hodi la’o ba oin”. Amu kapelaun hakotu.   

Foto Misa, abertura 06/01/23. Dok Oscar – Samodok

Fatin hanesan, depois misa Reitor Instituto Superior Cristal(ISC), Dr. Sebastião Pereira, dehan   ho tinan akademiku 2023, parte hotu tenke servisu hamutuk   hodi kontinua lori Instituto Superior Cristal ba oin ho di’ak liu tan, tanba durante tinan 2022, ISC nia programa estudu lubuk ida ho klasifikasaun B.

“Agradese ba ita hotu nia kolaborasaun sira durante tinan 2022. Agradese mos ba Governu, setor privadu no instituisaun Relevante sira seluk, liu –liu Ministeriu Ensinu Superior Siensia no Kultura, nia avalisaun hodi avalia ba kursu ne’ebé estabelese iha Cristal”. Hato’o husi Reitor.  

Parte seluk, Presidente Ezekutivu Fundasaun Cristal, Agostinho dos Santos Gonçalves, husu edukador iha Instituisaun Edukativa Cristal, hahú husi eskola nivel ensinu básiku to’o nivel ensinu superior, iha tinan letivu foun no tinan akademiku 2023, tenke buka no kontinua eduka estudante sira ho domin, pasensia, hodi garante estudante sira nia futuru.

“Hanesan Eskola Salesiano, tenke implementa nafatin sistema preventivo Don Bosco. Razaun, Amor no Reliziaun. Knar edukador mak eduka, akompaña la’os baku, no haksiak bebeik. Se estudante sira nakar, tenke buka hatene razaun saida, no eduka tenke ho domin- pasensia, no importante mos tenke eduka sarani ne’ebé  di’ak la’os de’it fó matenek, tanba etika no moral importante tebes. Sa tan tempu ida agora bele dehan araska”. Lian Presidente Ezekutivu FC.

Parte importante ida, Presidente Eventual Cristal tinan 2022, Rafael savio, rekoñese durante tinan 2022, mahein sira husi Instituisaun Edukativa Cristal hanesan Ilas Don Bosco, Ilas Nai Feto Auxiliadora, ilas São João Paulo Segundo, Kristu Nai Liurai, konsege hala’o vizita ho susesu kobre munisipíu 14,  liu –liu koopera ho igreja lokal sira, hodi halo  adorasaun hamutuk ho sarani sira, hodi  husu bensaun, tulun, grasa ba sarani hotu iha munisipíu ida – idak.

“Obrigadu ba apoiu sira husi parte hotu, tanba durante ha’u nia mandatu liu –liu vizita mahein eskola nian ba Munisipíu sira la’o di’ak tebes. Lahaluha mós agradese ba Presidente Ezekutivu Fundasaun Cristal no apoiu sira seluk tan”. Nia hato’o.

Observasaun Media ne’e nian depois misa abertura, iha mós aprezentasun Puizia husi estudante sira, no atividade kanta animasaun.  Alende ne’e, komisaun organizadora fahe sertifikadu apresiasaun ba edukador & funsionariu husi Fundasaun Cristal, ne’ebé presta ona servisu di’ak durante tinan 2022. Funsionáriu  sira ne’e mak ho naran hanesan tuir mai:

1. Mariana da Silva Biquinta(Profesora)
2. Sabino C. Magno(Edukador nivel enisnu básku terseiru ciclo)
3. Xisto da Silva
4. Agapito da Silva, Xefe logistica Fundasaun Cristal.
5. Marianita Madalena Cardoso, Tezoureira Fundasaun nian.***(TTM)