Ensera Kampaña Presidensial Tinan 2022

Loron 16 fulan Marsu 2022, tuir Kalendariu husi Komisaun Nasional Eleisaun(CNE), laiha ona atvidade kampaña eleitoral, husi kandidatu Presidiente Repúblika, hahú husi  númeru 1 to’o númeru 16.

Tanba ne’e, iha loron kinta (17 Marsu 2002), dadeer san de’it iha Dili laran, laiha mós foto ka baner husi kandidatu Presidente Repúblika sira nian, ne’ebé monta iha dalan publiku, hahú husi dalan Becora to’o ba Tasi – Tolu, Dom Aleixo, Dili Timor – Leste

Relasiona ho loron enseramentu kampana nian, kurta, (16/03), maioria kandidatu sira hala’o iha kapital Nasaun, iha ne’ebé ensera iha oras loraik, maske iha udan bot nia laran, maibé apoiante sira labaruk hodi partisipa iha atividade kampaña nian to’o hotu.   

Entretantu, mensajen ne’ebé kandidatu sira hotu hato’o, hahú husi númeru Sorteiu 6, 8, 9, no seluk tan, husu ba povu Timor – Leste, liu –liu ba apoiante tomak  katak, “Keta haluha iha loron 19 fulan Marsu 2022, hotu – hotu tenke ba iha sentru votasaun, hodi hili kandidatu Presidente ida ne’ebé sente di’ak liu, ikus mai hetan lejitimidade husi povu, hodi sai nu’udar Xefe Estadu, hahú iha loron 20 fulan Maiu 2022, to’o ba loron 20 fulan Maiu 2027”.   

Reprezentante komunidade ki’ik ida iha suku Bebonuk, ho naran Matebian – Ramelau dehan, kampaña Presidensial 2022 hotu ona, tanba ne’e lider sira mós, labele ona trata malu, hanesan bainhira hamri’ik iha palku leten, hodi hala’o kampaña Presidensial 2022.

“Para ona ba ho trata malu. Kampaña Presidensial hotu ona. Agora se mak atu sai xefe Estadu importante hala’o kna’ar tuir konstituisaun. Labele mós halis ba interese Partidu sira nian, se la’e empase politik kontinua eziste, ikus mai povu mak kontinua terus, depois tinan liman mai kontinua husu votus”. Sidadun ne’e, dehan ba Time Timor liuhosi dada lia badak iha suku Bebobuk, kinta (17/03).

Antes termina nia husu ba sidadaun Timor – Leste tomak, tempu ba vota, obrigadu hakbesik aan ba sentru votasaun, ida ne’e hanesan obrigasaun sidadaun nian.

“Ba ha’u hanesan sidadaun di’ak, tenke ba vota. Depois vota hotu, husik ba orgaun eleitoral nian mak bele hala’o servisu. Ba povu ki’ik sira, bele kontinúa hala’o ida – idak nia atividade hanesan baibain, maibé importante mak pas no estabilidade”. Nia hato’o hodi termina.*****(Time)