Fernando Mesquita “20 de Maiu Nu’udar loron Ksolok ba Timoroan”

Diretor Ensinu Básico 3⁰ ciclo Cristal, Fernando Mesquita, refleta ba selebrasaun tinan 20, restaurasaun RDTL, lori eskola Cristal nia naran hamutuk ho profesores, estudante sira temi katak, 20 de Maiu tempu ksolok ba Timoroa sira .

“Hato’o ami nia parabens ba povu Timor – Leste, ne’ebe selebra 20 de Maiu 2022. Parabens ba Presidente Foun Dr. José Manuel Ramos Horta, obrigadu mós ba Presidente sesante Dr. Francisco Guterres – Lu – Olo”.   

Parte ida dirijente ne’e rekonese, durante tinan 20 nia laran povu, Timor – Leste, moris iha dame, paz, no liverdade nia laran, maske Nasaun sei hasoru problema oin – oin.

– Ami iha eskola ida ne’e, hanesan parseiru Governu firmi nafatin, hodi atende estudante sira ho di’ak, maksi iha situasaun sira ne’ebé, dala ruma ladun di’ak, ezemplu  Covid – 19  no seluk tan, maibé ho lideransa sira nia esforsu tomak/Enerjia husi parte eskola no parte Governu, parseiru sira hotu, inan – aman, inklui estudante sira rasik, konsege dudu Mundu edukasaun iha Nasaun bele la’o di’ak. Hato’o husi Fernando Mesquita.

Bainhira hasoru malu Time Timor iha loron 19 fulan Maiu 2022,  husu ba Presidente foun, hodi servisu hamutuk ho Governu, nune’e bele tau matan mós ba parte edukasaun, espesialmente buka solusaun ba edukador sira ne’ebé, servisu ho voluntariamente(profesor voluntariu sira). 

“Husu ba Presidente foun tenke servisu ho Governu, hodi haree ba estatuto professor sira nian, nune’e, lori setor edukasaun sai di’ak liu tan”, pedidu  husi diretor. 

“Ami iha esperansa ba Dr. José Ramos Horta, Presidente ba periodu ida ne’e, sei lori ita nia Nasaun ba dezenvolvimentu ne’ebé di’ak liu, tamba haree ba kapasidade ne’ebé maximu tebes hodi lidera Nasaun ba oin”

Antes hakotu dada lia ho Time Timor, Fernando Mesquita  hato’o komprimentu no agradese ba parte hotu.

1. Ami hotu orgullu tebes ba ami nia Presidente foun Sr, Dr. José Ramos Horta
2. Agradese mós ba Presidente Sesante Francisco Guterres “Lu – Olo”ne’ebé durante tinan lima(5), nia laran servisu ho pasensia,  maske atende problema oin – oin, hanesan covid  – 19, no seluk tan  relasiona ho povu nia moris(Nasaun)
3. Obrigadu Presidente sesante ba sakrefisiu tomak. Ami hotu hanesan povu Timor nafatin iha esperansa ba ita bot sira, liu –liu lider rejistensia sira atu hamutuk haree ba interese povu no Nasaun ida ne’e.
4. Parabens ba povu tomak.

“Mai ita tane aas, Ispiritu nasionalismu, unidade, paz, harmonia hodi to’o ba progresu dezenvolvimentu Nasional” ***(TTM)