Ezistensia ISC ba Dala 20: Parte Hotu Hato’o Parabens no Husu Hadia Kualidade

Iha loron 21 fulan Novembru tinan 2021, Instituto Superior Cristal (ISC), kompleta nia ezistensia ba badala 20(Rua Nulu).

Relasiona ho Dies Natalis ne’e, iha domingu – loron 21 fulan Novembru 2021, okaziaun misa asaun grasa, ne’ebé Instituisaun Edukativa Cristal (IEC) – Fundasaun Cristal (FC), realiza iha Santuariu Kristu Rei(Fatukama – Dili) parte lubuk ida,  hato’o parabens ba ISC, ho esperansa ida hato’o Katak, ensinu Superior Privada ne’e,  kontinua hadia kualidade, nune’e, bele eduka Timoroan sira, sai sarani ne’ebé di’ak, no sidadaun ne’ebé honestu, bazeia ba  prinsipiu São João Bosco.

Mensajen hirak ne’e, hato’o husi  Presidente Antigus Alunus Salesiono Dom Bosco Timor – Leste, Asebedo Marçal, no Padre Kapelaun Cristal, Pe. Manuel Pinto, SDB, inklui  deputadu balu hanesan alumni Cristal ne’ebé oras ne’e, nu’udar  membru Governu iha Oitavu Governu Konstitusional, inklui mós reprezentante povu iha uma fukun Parlamentu nian, daudaun ne’e, sai ona alumni Cristal.

Relasiona  ho misa iha Santuariu Kristu Rei – Dili, Reitor ISC, Dr. Sebastião Pereira dehan, kada tinan rua – rua, Estudante Edukativa Cristal, Nivel hotu, hamutuk ho  Fundadores, inklui  dosente no edukador nivel hotu,  tenke hala’o misa iha Santuariu Kristu Rei Dili,  hato’o sinal agradesimentu.

“Tinan 2019, ita hala’o misa aksaun grasa iha Santuariu ne’e, hamutuk ho amu Bispo Diocese Dili, Don Virgilio do Carmo da Silva. SDB.  Ba tinan ida ne’e, hamutuk ho padre kapelaun Cristal, Pe, Manuel Pinto, SDB, hodi agradese ba padrueira Instituisaun Edukativa Cristal, Kristu Nai Liurai,” Reitor hato’o ba Jornalista sira hafoin misa  iha Santuariu Kristu Rei, domingu(21/11).

Observasaun Jornalista Time Timor iha Santuariu Kristu Rei, antes misa, Estudante no edukador sira hala’o uluk meditasaun durante minutu  Rua – nulu, hodi husu bensaun no beran  ba Kristu Liurai,  hamutuk ho Grupu meditasaun Cristal nian, ne’ebé lideradu husi Florentino Sarmento, hodi  Refleta ba prinsipiu tolu, “Neon, Isin no Klamar”.

Misa  ne’e mós, didika espesial  ba eis Presidente Fundasaun Cristal, Maktoban Frederico Almeida Santos, tanba kompleta tinan ida, husik hela mundu. Matebian tanba iha devosaun maka’as ba Kristu Nai Liurai, nune’e, mate los iha loron selebrasaun Festa Kristu Nai Liurai, iha loron 21  Novembru 2020. *** (Time)