FM Vota ba  CNRT  Hakarak Halo Mudansa

Dirijente Partidu Frente Mundança(FM)Ricardo C, Neu, hateten maske la kompete iha eleisaun periodu ida ne’e,  maibé  estrutura FM nivel aldeia, suku, to’o nacional iha orientasaun ida klaru, sei vota ba partidu  Congresso Nacional da Reconstrução Timorense(CNRT),  tanba FM iha programa hanesan no CNRT, liu –liu  hakarak halo mudansa ba povu no Nasaun nia moris di’ak.

“Ami hotu deside ona, hodi vota ba avô Nana, iha loron 21 fulan Maiu 2023, tanba programa hanesan. Desde  prinsipiu FM hakarak mudansa ba povu nia moris. Ida ne’e sai preoridade importante. Frente Mudança(FM), haree katak periodu ba eleisaun ida ne’e, nu’udar  referendum segundu nian, hodi halo mudansa iha aspeitu oin – oin, inklui restaura fali situasaun lubuk ida ne’ebé presiza hadi’a iha periodu ida ne’e,” lian Ricardo ba Media Nacional, liuhusi entrevista iha Pantai – Kelapa, Dili, tersa (16/05).

Dirijente ne’e hateten vota ba Númeru 12, la’ós ezizi kadeira maibé importante mak bainhira hetan forsa politika , iha  Governu no asentu iha Parlamentu, presiza halo mudansa, liu –liu lori povu ba moris di’ak.

“Sai lider tenke servi’i povu. Labele  servi’i aan rasik. Povu ida – idak iha direitu ba moris di’ak. Se sai lider buka di’ak ba aan rasik, ida ne’e di’ak liu hari’i  de’it kompania nune’e bele fó moris  ba aan mesak”, nia esplika.

Tanba ne’e, Ricardo husu ba Sidadaun hotu, atu disidi no haree didiak partidu ida ne’ebé di’ak iha programa di’ak ligasaun ho prosesu dezenvolvimentu ninian.

“Tinan lima mai agora  Timor tenke abanza ba oin, nune’e, la bele sai fali Estadu falladu. Atu atinzi ida ne’e, sidadaun ida – idak iha loron 21 fulan Maiu 2023, antes hili tenke haree didiak tuir konsensia ida – idak. Maibé ba Frente Mudança sei vota ba númeru 12, hodi apoiu avo Nana” hato’o husi Ricardo.

Frente Mudansa iha esperansa bot ida katak, nafatin  konsisten ba prosesu mudansa nian signifika povu iha era ukun tenke moris di’ak. Bainhira mukit sei iha Nasaun doben, Frente Mudansa kontinua luta hodi lori povu sai husi situasaun mukit ninian ba moris di’ak.

Antes termina Ricardo rekonese Nasaun tenke asegura pontu hat ne’ebé importante ba periodu tinan lima nian

1. Hametin Direitu demokratika no asegura tratamentu justu ba ema hotu.
2.  Tenke halo mudansa ba area justisa. Signifia aplika Lei no ordem ne’ebé loloos, lei mak tenke uluk, se ordem mak uluk nee ditadura.

• Rekursu Umanu sai fator importante  tanba povu atu moris di’ak ne’e mai husi ema nia hanoin kreativu no inovativu.

•  Ekonomia tenke di’ak, hodi garante saude mós di’ak. ****(TTM)