Maria Francisca Belo de Assis, ne’ebé lori nia oan feto ho naran Victoria Guiditta Assis Caeiro, bainhira partisipa iha certame ne’ebé Cristal realiza ba eskola nivel terseiru Ciclo, hato’o lian kontente tanba liuhusi certame, bele lori estudante hotu hodi aprende di’ak liu tan durante hala’o prosesu ensinu.
“Victoria Guiditta Assis Caeiro, ha’u nia oan, segunda filha ne’ebé hala’o estudu iha eskola São Carlos – Aimutin – Dili. Kontente tebes sira bele partisipa iha Certame tanba eskola hili estudante ne’ebé mak iha valor di’ak hodi partisipa. Iha segundu periodu ne’e nia mos hetan klasifikasaun di’ak. Partisipa iha certame hamutuk ho kolega sira hanesan oportunidade di’ak, oinsa promove sira nia konesimentu, no treina kedas mentalidade hodi bele ko’alia liu –liu responde ba perguntas hotu ne’ebé iha,” hato’o Maria ba Time Timor liuhusi entrevista badak iha Salaun enkontru Cristal, Balide – Dili, sesta(26/06).
Foto Partisipa Certame, 26/05/23
Inan ho oan rua ne’e(Mane ida – feto ida), hato’o opiniaun ida katak, eventu certame importante ba estudante sira, nune’e rekomenda ba Ministériu Edukasaun Joventude no Despostu presiza realiza certame nivel nasional ba eskola hotu iha teritóriu laran tomak, hahú kedas husi eskola nivel pre – eskolar ba to’o ensinu superior ninian.
“Ha’u nia rekomendasaun ida hodi husu ba Ministériu Edukasaun Joventude no Desportu, se bele realiza certame nivel nasional ba eskola sira hotu iha teritóriu laran, hahú husi kedas husi eskola nivel pre – eskolar to’o ba ensinu superior, nune’e, bele motiva estudante sira hodi aprende ho di’ak.” Rekomenda husi Maria hodi hakotu.*****(TTM)
Discussion about this post