Lia Tatoli ba Governu da Sia

Martinho Francisco da Silva, xefe aldeia, Metin I, Bebonuk, Postu Administrativu Dom Aleixo, Munisipíu – Dili, husu ba Governu konstitusional da Sia, ne’ebé lideradu husi Kay Rala Xanana Gusmão, inklui membru Governu sira tomak, tenke servisu maka’as liutan, hodi haree ba situasaun sira ne’ebé povu iha base hasoru, liu –liu be’e mo’os, Estrada, no kestaun básika sira seluk hanesan fasilidade eskola, hospital no seluk tan.

Martinho Francisco da Silva, xefe aldeia, Metin I, Bebonuk- Dili, foto 01/07/23

“Ita nia problema urgenti ne’ebé presiza fo atensaun di’ak liu maka asuntu be’e mo’os, asesu estrada, eletrisidade no asuntu basika sira seluk.   Povu sira hein hela ida ne’e, maske Nasaun ne’e, restaura nia ukun aan kuaze tinan 20 resin ona”, hato’o husi Martinho ba Media ne’e, liuhusi entrevista badak iha Aldeia Metin I, Bebonuk – Dili, sabadu (01.07).

Nu’udar sidadaun Martinho mós husu ba Governu da Sia, se bele kontinua hikas programa sira ne’ebé mak hala’o ona iha Oitavu Governu konstitusional, hodi kontinua hikas programa ne’ebé lori benefisiu direta ba povu ki’ik sira.

“Governu ida ne’e, se bele haree fali hodi kontinua hikas programa Uma ba Kbi’it Laek, programa sesta básika, programa dollar atus rua (200), tanba programa sira ne’e, lori benefisiu direta ba povu hodi bele sente liu –liu komunidade kbi’it nato’on iha area rurais”. Nia husu hodi hakotu.

Iha fatin ne’ebé lahanesan, Agusta Barreto, husu ba Governu da sia, atu haree kondisaun Estrada iha Munisipíu Maliana tanba Estrada Maliana  vila ba Bobonaro, iha tempu udan foin lalais, kotu, hodi difikulta movimentu transporte públiku no privadu.

Foto TTM, 01/07/2023

“Governu foun tenke servisu maka’as haree ba problema Estrada. Ida ne’e esensial liu – liu iha Maliana. Karik  dalan a’at, labele husik kleur nune’e ema balu bele politiza ba asuntu politiku maibé ho urgenti tenke hadi’a lalais ida ne’e de’it mak hakarak hato’o ba Governu,” lian husi Agusta hato’o ba Media ne’e iha Rotunda Presidente Nicolau Lobato – Dili, bainhira husu nia lia tatoli ba Governu da Sia.

 Hanesan ema idoza  husu mós ba Governu hodi tulun nia familia,  nune’e  hari’i uma ho kondisaun dignu tanba oras ne’e hela iha Beto- Comoro, Dili.

Dok. TTM

“Hakarak husu tan ba Governu se bele kontinua nafatin programa halo uma ba povu ki’ik, ida ne’e tulun tebes komunidade ki’ik ho rendimentu nato’o. Ha’u loron – loron fa’an de’it has oinsa bele halo uma”. Hato’o husi  Augusta ho espresaun triste nu’udar lia tatoli ba Governu foun ida ne’e. ***** (TTM)