Loron 30 fulan Agusto tinan 1999, Povu Timor – Leste hala’o votasaun ba konsulta popular ou votasaun ba opsaun simu otonomia no rejeita otonomia husi Negara Kesatuan Republik Indonesia (NKRI).
Refleta ba loron 30 fulan Agostu tinan 2022, Timor – Leste, komemora ona, loron konsulta popular ba dala 23(30-8-1999 – 30-8-2022).
Guida Castro e Sousa, hanesan sidadaun ida ne’ebé hela iha parte Caicoli – Dili dehan, tempu ne’eba, nia atinzi ona tinan 17, nune’e konsege vota, hodi determina distinu povu Maubere, nune’e, ohin loron ema hotu bele moris hodi goja iha País ida ne’e.
“Iha loron 30 fulan Agustu 1999, Tinan 23 liu ba kotuk, haú mós vota tanba kompleta ona tinan sanulu resin hitu (17). Maske la’os ema funu na’in maibé husi votasaun ne’e, nia resultadu mak ohin loron ita livre ona, hodi moris hanesan País ida. Tanba ne’e ha’u, orgullu sai hanesan Timoroan tanba iha tempu difisil bele vota iha folin ba ukun rasik aan,” istoria ne’e, hato’o husi Guida Castro ba Time Timor iha Jardim 5 de Maiu, Colmera – Dili, bainhira partisipa iha feira ba komemorasaun loron konsulta popular ba dala 23.
Sidadaun ne’e dehan, bainhira atu vota no depois vota, antes loron 30 fulan Agostu tinan 1999, situasaun iha Dili laran, hahú manas. Nune’e hamutuk ho familia, evakua ba Becora, Mota – Ulun, parte Karau Mate nian.
“Triste tebes bainhira votasaun hotu. Aat liutan tama ba anunsia rezultadu konsulta popular nian iha loron 4 fulan Setembru 1999, ahi komesa suar iha Dili laran, ema mate, uma sira hetan estragus. Maibé ami halai ba parte Becora, hodi salva aan, husi situasaun perigu,” nia konta.
Antes termina dada lia ho Media ne’e, husu ba Timoroan hotu, iha era liverade nia laran, tenke hadomi malu, respeita malu nafatin, tanba ukun aan ida ne’e, la’os mai le’et deit.
“Hosi terus, matan be’e, ruin no ran mak ita sai Nasaun ida. Timoroan sira tenke orgullu, moris dame- malu, paz no moris iha estabilidade nia laran sai ita hotu nia responsabilidade. Diferensa ideas, diferensa politika, no organizasaun iha fiar no arte ritual, ou arte marsiais, labele haketak Timoroan sira.”Guida husu hodi hakotu.
Intervensaun no mensajen paz husi PR iha loron konsulta Popular ba dala 23
Presidente da Repúblika José M Ramos Horta, liuhusi nia deskursu iha Jardin 5 de Maiu – Colmera, Dili rekonese hodi dehan, – Antes akontese loron konsulta popular, Timoroan sira moris iha situasaun sira ne’ebé perigu, maibé tanba ho Frente Armada, Frente Klandestina no Frente Diplomata, konta mós apoiu husi Igreja, no Nasaun lubuk ida, Portugal, Indonesia no seluk tan, Timor – Leste, bele realiza konsulta popular iha loron 30 fulan Agostu tinan 1999.
Tuir Ramos Horta, bainhira ONU atu realiza eleisaun ida, primeiru kondisaun ida tenke iha situasaun kalma. Situasaun Timor – Leste nian, fase ba votasaun iha loron 30 de Agostu, maske iha dezafiu, maibe la impede totalmente votasaun ne’ebé mak iha.
Tanba ne’e, Presidente agradese ba apoiu husi parte hotu inklui heroi sira hotu, hahú husi Proklamador Francisco Xavier do Amaral, Niculau Lobato no sira seluk.
Presidente mós husu ba Timoroan sira, iha era liverdade buka hodi moris iha dame no paz nia laran, só nune’e de’it mak labele repete fali Guera Civil hanesan akontese ona iha pasadu.
“Tanba saida Guera Civil mosu hahú tinan 1975, hodi ikus mai dura ba tinan 24. Timoraon sira mak estraga malu. Ita mak karega kilat ba malu. Ita mak ohon malu. Ita mak asalta malu. Tanba ne’e, ita labele hatudu lima ba malu bebeik, espesialmente iha tempu liverdade nia laran nune’e, fó biban ba dezenvolvimentu”, deskursu Presidente.
Ligsaun ho eventu komemorativu loron konsulta popular ba tinan 2022, Ministru Estatal Miguel de Carvalho Amaral, atual Presidente komisaun organizadora ba eventu sira dehan, – Atividades no eventu komemorasaun nian hala’o hotu kobre Munisípiu sira hotu, la’ós de’it iha kapital Dili.”
Obserbasaun Jornalista Time Timor iha Jardin 5 de Maiu, eventu komemorativu loron konsulta popular asiste direta husi Presidente Repúblika José M. Ramos Horta, hamutuk ho funsionar Estatal, parte Siguransa no Defese inklui komunidade sira iha parte Colmera no Motael nian.
Parte importante ida ba atividade desportiva, hodi komemora loron konsulta popular, bensedor ou manan na’in sira hotu, hetan premiu husi emprezariu lokal no Internasional sira lubuk ida ne’ebé hala’o knar iha Timor – Leste **** (TTM)
Discussion about this post