Manorin na’in ida iha Eskola Sekundaria Cristal, Zelio da Conceição Freitas, hateten kna’ar Edukador nian, bainhira hala’o funsaun ho responsabilidade, eduka ho hahalok di’ak, domin na’in, pasensia, sai ezemplar ba estudante, sei determina futuru Estudante nian.
Tanba ne’e, nia husu ba manorin na’in sira hotu iha Timor – Leste, espesialmente profesor sira iha Eskola Cristal kontinua hala’o kna’ar ho responsabilidade, bazeia ba funsaun ne’ebe mak iha.
Entretantu, refleta ba tempu covid – 19, ligasaun ho Konfinamentu Obrigatoriu(KO) no Estadu Emerjensia(EE), iha tinan rua liu ba (2020 – 2021), edukador ne’e hato’o, bainhira Ministériu Edukasaun Joventude no Desportu husu eskola hotu, implementa aula online iha tempu Covid – 19, liu -liu iha fulan Marsu 2021, ida ne’e impede tebes prosesu aprendizajen tanba laiha aula prezensial.
“Sim, tinan 2020, 2021, estudante no edukador sira hotu, hasoru dezafiu ne’ebé kompleksu tebes, aula prezensial troka fali ba aula online. Mesmu ke iha eskola distansia(virtual), maibé rede internet, inklui partisipasaun estudante nian ladun masima,” kestaun ne’e, hato’o husi profesor Zélio ba Time Timor liuhosi entrevista iha eskola Cristal, Balide – Dili, kuarta(09/03).
Hatutan, iha tinan letivu 2021, alende hala’o ensinu distansia, profesor sira mós halo resumu ba materia sira hodi fasilita no distribui ba estudante sira iha uma. Tanba ne’e ezame iha tinan 2021, segundu periodu hala’o de’it iha uma, koresaun iha eskola.
“Tempu Konfinamentu no Estadu Emerjensia, maske hasoru dezafiu, maibé eskola uza meius oin – oin, hodi fasilita estudante sira iha uma hodi akompaña lisaun. Maibe partisipasaun kuaze 80 %. Ezame segundu periodu estudante sira simu materia ezame nian iha eskola, hodi ba priense fali iha uma, depois hatama mai eskola hodi hetan valor,” hato’o husi profesor Cristal ne’e.
Antes termina dada lia ho Media ne’e dehan, ba tinan letivu 2022, eskola Sekundaria privada Cristal, hahu hikas fali ona aula prezensial, iha ne’ebé hahú kedas iha fulan Janeiru tinan 2022.
“Ita hahú ona aula prezensial iha fulan Janeiru liuba. Atividade ne’e la’o ho di’ak tebes. Maibé atu estudante sira aproveita ho di’ak, partisipasaun ativu alunu nian sai sasukar importante tebes”. Nia hato’o hodi hakotu.
Iha fatin hanesan estudante terseiru ano Cristal, kursu Siencia Sociais, Juvencio da Costa, no Nelciana Bossa dehan, atu dezenvolve Timor – Leste, la’ós de’it iha mehi, maibé presiza liuhosi asaun konkreta mai ho ezijensia tenke estuda maka’as liutan, ikus mai bele sai sidadaun ne’ebé fó partipasaun ativa, iha kualker dezenvolvimentu Timor – Leste nian.
“Esperansa ba futuru hakarak sai sidadaun ne’ebé partisipa ativa iha kualker prosesu dezenvolvimentu País nian. Maibé mehi bot ida mak hakarak sai embaixadora”. Lian husi Nelciana Bossa Gonçalves.****(Time)
Discussion about this post