MLPM Iha Programa Atus Ida Liga ba Nasaun – Povu

Movimentu Libertasaun Ba Povu Maubere(MLPM), iha programa atus ida (100), liga direta ba Nasaun – Povu nian moris iha area Saúde, Edukasaun, Agrikultura, ekonomia, Infraestrutura no area seluk tan.

Responsabel ida husi MLPM, Miquel Manetelo(Mimo), dehan programa ne’ebé trasa husi MLPM, hakarak Maubere/buibere oan sira (Feto -Mane) iha era ukun ukun aan, tenke moris di’ak no labele sai atan bebeik ba ema seluk iha nia rai rasik.

 “MLPM hakarak povu Maubere tenke moris di’ak. Nia tenke sai patraun iha País ida ne’e.  Tanba  ne’e, tenke vota ba númeru 14, hodi lori povu sai husik mukit no kia’k, liuhusi implementasaun programa atus ida ne’ebé MLPM iha ona,” hato’o husi Miquel – Mimo ba Time Timor liuhusi entrevista  bainhira hasoru malu iha postu administrativu Dom Aliexo  Dili, tersa(3/05).

Nia dehan MLPM defende povu ai- leba nia oan sira ne’ebé buka moris  iha dalan ninin, Governu  – Estadu tenke dignifika sira tanba nu’udar povu Maubere de’it, labele duni sira tu’un sa’e hamosu tristeza no matan ween.

“MLPM mos lakohi siguransa sira duni inan – feton sira ne’ebé buka moris iha dalan ninin. Sira presiza kondisaun dignu antes foti asaun hasoru  sira tanba durante ne’e, duni sira hanesan ema seluk mai husi rai seluk nune’e fo prioridade liu ba ema estranjeiru sira,”  lamenta husi Miquel.

Partidu ho Númeru 14 ne’e, promete bainhira hetan fiar husi povu iha eleisaun jeral loron 21 fulan Maiu 2023, hakarak fó subsidiu ba votante sira hotu ne’ebé fó votus hodi  liverta ona Pátria.

“Durante ne’e veteranu sira simu ona osan, tanba sira nia didikasaun. Ba MLPM iha planu ida bainhira manan, mak sei fó subsidiu dollar atus ida(Sem dollar) ba ema ne’ebé vota iha loron 30 fulan Agustu tinan 1999. Subsidiu ne’e fó ba ema  hirak ne’ebé sei moris. Sira merese duni tanba lori mate/Brani hodi pregu mak determina futuru País doben ida ne’e. Timor sai livre no independente ohin loron ema hotu goza,” hato’o husi Miguel.

Hanesan sidadaun ida ne’ebé mós luta  ba rai ida ne’e, liuhusi aktu klandestina lamenta katak, iha era ukun aan atu dezenvolve País no povu, tenke liuhusi programa sira, la’ós konta historia no bosok povu.  

“Istória  hanesan momentu ka akontesimentu liga ba pasadu liuhusi prosesu ida. Maibé iha kontekstu ukun Nasaun hodi hadi’a povu nia moris, programa sai nu’udar instrumentu importante tebes hodi dezenvolve Nasaun no lori Povu ba moris dignu”. Hato’o husi Mimo hodi hakotu. *****(TMM)