Rafael Savio, nu’udar sidadaun Nasional Timorense rekonese hodi dehan katak, loron 30 fulan Agustu tinan 1999, importante ba povu Timor(Timoroan tomak), tanba laiha loron istóriku ne’e, laiha mós restaurasaun loron 20 fulan Maiu 2002, ne’ebé mak hala’o iha Tasi- tolu, Dili iha tinan 24 ba kotuk(20/05/2002- 20/05/2023).
Foto Time Timor Magazine.
“Nu’udar Timoroan hakarak dehan de’it katak iha loron 30 de Agustu 1999, dadeer nakukun de’it populasaun sira forma ona iha sentru votasaun hotu maske moris iha ameasa, intimidasaun, mate nia laran maibé firme metin nafatin hodi deside distinu rai no povu ida ne’e nian, ikus mai sai Nasaun soberana iha Reziaun Sudeste Aziatiku,” hato’o husi Rafael Savio ba Time Timor liuhusi entrevista badak iha nia knar fatin Balide – Dili, tersa(29/08).
Parte importante ida rekonese mós papel Falintil inklui organizasaun rezistensia no grupu sira hotu tantu iha movimentu ne’ebé apoiu ba luta livertasaun nasional, liu –liu antes hakat ba faze realizasaun loron konsulta popular iha loron 30 fulan Agustu tinan 1999.
“Ita labele haluha papel no valor luta husi Frenti tolu durante iha prosesu ba livertasaun nasional hanesan Frenti Armada, Klandestina no Frenti Diplomatika, inklui mós movimentu sira hotu, ne’ebé mai husi Joven inklui apoiu solidariedade husi nivel internasional ninian,” hato’o husi Rafael Savio.
Era Liverdade Joventude Presiza Moris iha Paz – Dame
Parte importante ida, nu’udar edukador ne’ebé hala’o knar iha eskola Cristal, nivel ensinu sekundaria nian ladun konkorda ho asaun konflitu sira ne’ebé sempre mosu iha kapital Dili no nivel Munisipíu, relasiona ho konfrontasaun entre grupu arte marsiais no rituais sira, liu –liu envolve direta husi joven sira(idade pridutivu) hanesan futuru ba Nasaun.
Tuir Rafael, Timor – Leste nia ukun aan ida ne’e mai husi terus, susar, ema barak mak mate, nune’e iha era liverdade bainhira joven sira kontinua no bebeik gosta baku malu, estraga ema nia uma, kria konfuzaun, hahalok sira ne’e, la valoriza ona heroi sira nia luta hodi sosa liverdade.
“Primeiru nu’udar inan – aman, edukador, sidadaun sente triste haree ita nia joven sira la dame malu. Gosta provoka malu hodi estrega ema nia uma, inklui sasan. Tenke iha hanoin ida katak tempu liverdade ezizi Joven sira buka aproveita tempu hodi estuda, servisu, nune’e prepara aan ba futuru,” nia husu hodi hato’o ba Joven Timoroan.
Tuir sidadaun ne’e nia hanoin ida katak, se de’it bele envolve aan iha grupu arte marsiais no rituais sira, maibe tenke konsidera ida ne’e hanesan atividade desportiva ba treina fizika nian no hanesan arte.
“Primeiru bainhira tama iha grupu arte marsiais no rituais labele mai ho hanoin kria de’it problema ou haree ema seluk hanesan adversariu. Arte marsiais nu’udar asuntu desportiva. Se treina hotu mak halo problema hodi baku ema arbiru de’it, asalta malu iha dalan, sona malu, halo ema seluk moris lahakmatek ida ne’e krime. Autoridade mak bele foti medida,” hato’o husi Rafael
Tanba ne’e, Sr Rafael Savio husu ba inan – aman, autoridade lokal nivel aldeia, suku bairo atu kontrola didiak joventude sira hodi minimiza konflitu no aktu violentu ne’ebe fó ameasa ba estabalidade nasional.
“Inan – aman tenke kontrola oan sira, autoridade lokal, igreja no eskola tenke buka hatene joven sira ne’ebé sempre halo problema iha bairo hodi identifika sira, nune’e hamutuk ho igreja, edukador kontinua eduka no realiza formasaun iha etika – moral nune’e prepara joventude sira ba futuru”. Hato’o hodi hakotu.
Intervensaun husi Estadu RDTL
Antes ne’e, iha loron 11 fulan Agustu tinan 2023, Presidente da Repúblika Dr. José Ramos Horta, liuhusi GMN TV rekonese, Estadu lakon kredibilidade kontrola konfrontu entre grupu arte marsiais– rituais sira iha rai laran tanba kontinua ataka malu iha aldeia, suku bairo, laran halo komunidade moris sentre lahakmatek no trauma.
Husi parte seluk Fundasaun Mahein(FM), ne’ebé tau matan ba setor Siguransa liuhusi diretor Nelson Belo, hato’o idea ida ba Estadu liu –liu konselu Siguransa Estadu nian presiza halo intervensaun politika hodi haree ba membru ka oknum arte marsiais no rituais sira ne’ebe sempre kria problema lori impaktu ba kestaun estabilidade.
“Husu ba konsellu Siguransa Estadu presiza halo intervensaun politika hodi haree ba konfrontasaun entre oknum husi grupu arte sira, liuhusi intervensaun husi parte politika, la’ós ho atuasaun ne’ebé hala’o husi Polisia sira iha terenu”. Lian Nelson Belo liuhusi Media GMN TV iha loron 10 fulan Agustu 2023.
Lider Arte Marsiais – Rituais la orienta membru halo problema
Konfirmasaun balu husi lider arte marsiais nian liuhusi Media nasional publika iha kanal oin – oin hodi rekonese, biar membru ka oknum sira halo problema maibé la’ós lider ka dirijente sira mak haruka halo problema hodi estraga ema nia uma, ka asalta malu iha aldeia, suku no bairo.
“Ita la orienta membru sira ida – idak katak, imi tenke halo problema. Ida ne’e aktu husi oknum ida- idak, iha ne’ebé lori problema pesoal, problem rai inklui asuntu seluk hanesan odiu malu partikular ninian”, lian husi dijente ida husi grupu Arte marsiais balu iha Dili, fulan Agustu 2023.
Foto Facebook, Agustu 2023
Husi parte seluk hodi minimiza konfrontasaun entre grupu arte marsiaias – rituais iha rai laran, Komisaun Reguladora Arte Marsiais konvida orador husi parte Igreja, Sociedade Civil iha fulan Agustu 2023 hamukut ho IKS – TL, realiza treinamentu balu iha Salaun Laline Larigutu, hodi mentaliza foinsa’e sira nia hanoin, vizaun oinsa hamenus konflitu, liu –liu entre grupu arte marsiais sira, hodi kontibui di’ak liutan ba kestaun paz no estalidade iha Timor – Leste.***(TTM)
Discussion about this post