Analista politika husi Instituto Superior Cristal, Ricardo Pereira, dehan iha Nasaun demokratika sira hanesan Timor – Leste, livre ba se de’it atu ko’alia promesa, liu –liu, ema politiku nain sira, bainhira tempu besik kampana tanba fa’an sira nia programa ba povu, karik manan, ezekuta liuhosi planu dezenvolvimentu kurtu no longu plazu.
Nia dehan, kuidadu tebes ho promesa falsa, tanba durante ne’e, organizasaun politiku sira tu’un ba povu inia let, hato’o mehi sira mesak furak, no bot hanesan elefante no foho Ramelau, foho Matebian , maibé ikus mai hetan konfiansa, realidade la’o neneik hanesan nehek ne’ebé dolar iha rai leten.
“Bele promete dehan ami mana sei instala bee moos, Estrada rural sei di’ak, hadi’a kondisaun eskola sira, eletrisidade, maibé ukun tiha mós, promesa sira ba povu ne’e, hein ba hein, ita haree besik mandatu remata tan ona, pelu menus halo netik buat ne’ebé promete ona ba povu,” Ricardo hato’o asuntu ne’e ba Jornalista Time iha Balide, sesta(1/10).
Tuir akademista ne’e nia haree, kuandu ukun na’in sira hatene promesa de’it, laiha realidade, povu mak sei julga liuhosi votus. Povu iha direitu atu hili tuir nia haree, hodi fihir organizasaun politika ida ne’ebe mak bele, iha duni avilidade hodi ba ukun Nasaun, tuir evolusaun mundu ohin loron.
“Povu Timor ne’e matenek ona. Ba oin nia sei haree, liu –liu iha periodu 2022 – 2023, karik ukun ladi’ak ou di’ak, desizaun popular, liuhosi eleisaun mak deside.” Nia esplika hodi hakotu.
Discussion about this post