Emprezariu Nasional Ricardo Cardoso Neu, dehan maske oras ne’e, Timor – Leste, ofisialmente seidauk sai membru Asean loloos(sei hanesan Nasaun Observador ida iha organizasaun Asean), maibé iha tempu oin mai, ekonomia nasional sei hakat ba progresu ho lalais tebes, tanba dezenvolvimentu ekonomia nivel Asean, oras ne’e, la’o di’ak no dezenvolve tebes.
“Ita nia ekonomia nasional sei sai di’ak, bainhira TL sai membru Asean difinitivu. Ita nia odamatan sei nakloke no ita mós bele sai. Alende ne’e, ho kepadatan penduduk iha ASEAN, kompostu husi Nasaun sanulu resin ida, hanesan oportunidade di’ak tebes dudu ekonomia iha Asean em jeral, bele la’o di’ak liu tan inklui ambiente ekonomia iha Timor – Leste”, hato’o husi Ricardo ba Time Timor iha nia Residensia, Pantai Kelapa, Dili, kinta(1/12).
Eis membru Governu ne’e, esplika ho klean katak, Nasaun Asia em jeral hanesan mós fatin civilizasaun antigu, tanba ne’e, China, Japaun, Singapura, Nasaun ne’ebé dezenvolvidu tebes iha setór hotu, no mundialmente iha klasifikasaun di’ak iha setor ekonomia global.
“Ba Timor – Leste, keta hakfodak bainhira tama no sai membru permanente ASEAN. Ba Ita nia emprezariu sira keta hakfodak tanba laiha ema ida moris mai, riku kedas. Alen ne’e, ita tenke buka adapta aan, ho mundansa sira signifika ohin loron mundu dijitalizasaun ita mós buka adapta aan la’os nafatin ho “Mesin Ketik””, esplika husi Neu.
Antes termina dada lia ho Time Timor emprezariu ne’e, husu ba maluk emprezariu sira seluk katak, atu dezenvolve Timor – Leste hanesan Nasaun seluk, primeiru tenke servisu maka’as, no servisu ho honestu(Jujur)la bosok
“Sai emprezariu tenke honestu. Alende ne’e, tenke buka konektividade ho parte hotu, bainhira hakarak susesu. Hetan osan nato’on, labele gasta dala ida de’it, ba asuntu ne’ebé lori ba dalan bankarota”. Nia hato’o hodi hakotu.
Entretantu media ne’e, hakarak fó hatene ba leitor sira katak, Timor – Leste, maske seidauk sai membru ASEAN permanente maibé Nasaun ASEAN sira konkorda ona hodi sai membru observador ida,iha loron 11 fulan Novembru 2022, ho objetivu ida hodi hakatak ba membru permanente. ***(TTM)
Discussion about this post