20/08/2026. Hanesan ita hatene katak, maske serimonia Nasional, hodi komemora loron Ezistensia Falintil nian ba dala 51, ne’ebé tuir Programa Estadu nian realiza iha Foho Matebian, Postu Administrativu Kelikai, Munisipiu Baukau, nune’e, Instituisaun Edukativa Cristal – IEC, ba tinan ida ne’e -2026, (Foin ba dala uluk), liuhusi estudante nivel tomak, hamutuk ho edukador no Fundador sira, selebra mós loron espesial ida ne’e, liuhusi atividade isar bandeira nasional, iha ne’ebe hala’o iha kampu Futsal Balide – Dili, Kinta(20/08).
Tanba ne’e, Prezidente Ezekutivu Fundasaun Cristal Dr. Agostinho dos Santos Gonçalves, dehan, Instituisaun Edukativa hakarak hala’o atividade serimonia isar bandeira nasional iha loron ne’e, hamutuk ho estudante sira, hodi fó onra ba heroi nasional hotu tanba Knar no papel Falintil nian durante tinan 24, importante tebes ba iha prosesu luta livertasaun Pátria.
“Uluk ita nia heroi sira luta, ohin loron ema hotu goja iha liverdade ida ne’e. Tan ne’e, Sentidu ida ita komemora loron ezistensia Falintil nian ba dala 51, hodi fó omenajen no hakruk ba sira hotu nia didikasaun. Barak mate ona, ne’ebe sei moris tenki nafatin fo respeitu ba sira. Jerasaun foun hotu iha era liverdade ne’e, oinsa buka nafatin hodi moris tuir prinsipiu – valor Falintil nian, tanba iha tempu susar Falintil defende Nasaun ida ne’e to’o hetan liverdade. Falintil nia ezemplu sira ba imi – estudante sira, no ita hotu, kontinua iha luta foun, liuhusi edukasaun. Tanba ne’e, ba estudante, alunu labele kolen hodi estuda nafatin, badinas eskola no aprende sai ema matenek, hodi servi’i Nasaun ne’e, lori ba iha progresu no moris di’ak iha sociedade, no ba ita aan rasik,” diskursu badak husi Prezidente Ezekutivu Fundasaun Cristal, hafoin termina serimonia Isar badeira, ne’ebé hetan partisipasaun masima husi alunu, estudante, edukador no Funsionáriu sira husi Instituisaun Edukativa Cristal.
Foto Alunu husi Eskola Nivel Ensinu Primeiru no Segundu Ciclo, Cristal, partisipa iha serominia Isar bandeira nasional, iha loron kinta(20/08).
Enkuantu planu ida hato’o husi Prezidente Ezekutivu Fundasaun Cristal katak, ba oin iha loron nasional sira, eskola sei hala’o programa oin -oin, liuhusi seminariu sira, nune’e, oinsa bele eduka foin sa’e sira bele iha sentidu nasionalismu no patriotismu liu -liu, konese di’ak liutan istoria Nasional iha Timor – Leste.
Discussion about this post