Serka Sanitaria Hanorin Timoroan Tulun Malu

Refleta ba implementasaun Serka Sanitaria no Konfinamentu Obrigatóriu iha Munisípiu Dili, maske situasaun difisil, maibé lahamate espiritu Timoroan sira nian hodi tulun malu, liuhosi Organizasaun Klibur Estudante.

Klibur Estudante hanesan MAL- Uatolari, Turiscai, Suai no seluk tan, konsege Mobiliza malu ona, hodi tau forsa hamutuk(finanseira), ba sosa necesidades bázikas (fós, mina no seluk tan), apoiu ba estudante hirak ne’ebé hela iha kost, ligasaun ho problema menus ai – han.

Refleta ba hahalok karidade ne’e, estudante balu dehan, bainhira hakarak apoiu ema seluk, tenke hasai husi ita nia bolsu rasik. Labele aproveita situasaun hodi husu ba Governu, mak ikus mai fó ba maluk ne’ebé presiza.

Midia ne’e, haree iha base katak, distribuisaun apoiu hirak ne’e, maske simples, maibé la’o di’ak no organizadu. Kada klibur estudante ida – idak, husi postu, ou Munisípiu, iha rasik ona lista fiksu.

Komparasaun ida, ba fali apoiu ai – han husi Governu ba estudante sira iha kost, liuhosi Universidade sira iha Dili, situasaun hatudu komplikadu ituan.

Hanesan estudante balu hetan, balun la’e. Signifika ba estudante ne’ebé lahela iha kost, ida – rua mós sai hotu benefisiariu, duke ne’ebé merese maibé, lakonsege.

Maske nune’e, governu liuhosi Ministériu Solidariedade Sosial no Inkluzaun(MSSI), kontinúa husu ba universidade sira, buka solusaun hodi haree ba asuntu ne’e.

Regulamentu husi Universidade  

Regulamentu husi parte Universidade balu fó sai ba benefisiaria hotu katak, ba estudante ne’ebé hela kost, antes simu apoiu ai – han husi Governu, presiza iha deklarasaun husi kost na’in sira, xefe aldeia, inklui hetan koñesimentu husi unversidade, ikus mai lista sira ne’e, bele submete fali ba parte Governu(MSSI), hodi halo ezekusaun tuir lista.

Prosedimentu ida ba Estudante Universitáriu husi Instituto Superior Cristal(ISC), submete dokumentu ba Universidade hodi hetan apoiu ai – han, dokumentu hotu liuhosi via Whatsapp. Priense uluk formularia mak hasai foto tenke klaru no mos, manda direta ba Universidade, komisaun akumula no halo lista ida, hodi submete ba Governu.   

Enkuantu implementasaun apoiu ai – han(fós)husi Governu ba estudante kost, iha fase dahuluk nian, realiza ona iha loron domingu (21/3), kobre Universidade sira mak hanesan:

1.   DIT kuaze estudante 373 mak sai benefisiarius
2. IOB kuaze estudante 726 mak sai benefisiarius
3. Unpaz 1510 mak sai benefisiarius
4. Cristal estudante 85 mak sai benefisiarius. (TTM)