Mosu opiniaun públika balu dehan, uza vacina AstraZeneca sei lori efeitu negativu ba ema nia saúde, wainhira Governu Timor implementa ida ne’e. Maske nune’e, opiniaun ida husi, diretor Labeh Chirstopher A. Samsum hato’o katak, realizasaun vacina ho modelu saida de’it, depende fali ba dezisaun pólitika – governu nian, husi Nasaun ida – idak.
“Atu uza vacina AstraZeneca ka modelu seluk tan, depende Governu. Bainhira haree AstraZeneca ne’e di’ak, laiha problema,” hato’o Christopher ba Jornalista Time Timor, tersa (30/3).
Nia hato’o tan, Nasaun balu iha Eropa, Asia, kuandu sira nia Governu lakohi uza vacina modelu AstraZeneka hodi kontra Corona Virus, sira iha direitu atu rezeita.Maibé mós Nasaun balu uza ai – moruk vacina husi China, tanba Covid – 19, mai husi ne’eba.
“Nasaun ida iha direitu hodi rezeita tanba direitu. Maibé intesaun husi vacina ne’e, só hasa’e imunidade ema nian, hasoru moras Covid – 19 no seluk tan.” Hato’o hodi hakotu.
Antes ne’e, eis Presidente da Repúblika José Ramos Horta, liuhosi media nasional balu hateten ona katak, vacina AstraZeneca la iha efeitu ne’ebé negativu ba ema nia saúde.
“Ha’u ko’alia ona ho Timoroan sira iha liur, inklui ema balu iha Amerika ne’eba, sira dehan, vacina AstraZeneca, laiha problema, dala ruma sente uluk moras ituan, maibé lahalo mal ba saúde.” Lian eis Presidente.
Entretantu iha Parlamentu Nasional iha loron kuarta (31/3), bainhira debate konaba hanaruk Estadu Emerjensia ba dala sanulu resin rua, bankada Governu no bankada opozisaun, husu ba Primeiru Ministru Taur Matan Ruak, atu haree no hadi’a jestaun, hodi funu hasoru Covid – 19 iha Timor, para hein ba realizasaun Vacina kontra Covid – 19, tuir politika Governu nian.
Enkuantu Ministériu Saúde deklara katak, realizasaun vacina AstraZeneca, iha Timor bazeia ba rekomendasaun husi parte relevante sira. Maske nune’e, Governu mós prepara ona equipa balu liuhosi treinamentu adekuadu, antes implementa Vacina Nasional kontra Covid – 19. ***(Time Timor)
Discussion about this post