Fonte lubuk ida, nu’udar Timoroan, haree ba inundasaun ne’ebé foin lalais akontese iha kapital Dili dehan, uluk kedas dezde Portugés nia tempu, fatin sira hanesan Caicoli, Aitarak – Laran, Bidau, Tasi – Tolu, sai hanesan be’e nia fatin. Tanba ne’e, di’ak liu Kapital Nasaun Timor – Leste, muda fali ba Munisípiu Baukau.
Sujestaun balu mós dehan, iha futuru labele kontinúa uza Dili sai kapital Nasaun, tanba fasil tebes akontese inundasaun bainhira udan bot. Alende ne’e, iha Munisípiu Aileu, udan bot ona, be’e tenke tun hotu mai Dili, hanesan fatin deskaregamentu ikus, antes tun ba tasi.
Realidade hatudu ona, mota Becora, Comoro, seidauk konta ho mota ki’ik seluk, sempre hamosu dezastre, hodi halakon ema nia vida, inklui estragas uma komunidade nian, sasan privadu, edifisíu Estadu nian sira mak hanesan, Palácio Presidente da Repúblika atual, no edifisíu importante seluk, afeta servisu públiku.
Maske nune’e, mosu opiniaun públika no deklarasaun politika sira iha Parlamentu Nasional, sempre fó sala ba Governu dehan,laiha planu di’ak, dala ruma mós uza asuntu inundasaun sai fali asuntu politika, hodi hatun Governu ida, hahi no hewai Governu seluk.
Loos duni durante ne’e, iha esforsu oin –oin, dezde Primeiru Governu to’o ona Oitavu Governu ne’e, sempre iha atensaun no antesipasaun liuhosi konstrusaun sira ba drainazen iha mota sira hanesan Becora, Comoro, inklui hadi’a baleta ki’ik sira seluk iha sidade laran, maibé finalidade udan sempre tama ba iha komunidade nia uma.
At liutan komunidade sira ne’ebé soe foer arbiru, halo uma taka be’e dalan, barak sei ulun to’os, hakarak halo uma besik kedas mota ninin, no foho lolon, tenke simu impaktu bainhira kuandu mosu dezastre naturais sira.
Konaba asuntu labele halo uma iha mota ninin, no tasi ibun, Estadu sempre alerta katak, labele halo uma besik mota ninin, menus husi 500 metrus. Alende ne’e, bandu komunidade labele halo uma iha tasi – ibun, mas iha realidade la’o oin seluk.
Ba Kapital Dili iha prediksaun balu dehan, iha tinan 30 mai, Dili sei menus be’e iha rai okos, nune’e fasil tebes tasi be’en sei infiltra mai rai maran, husi rai okos.
Area kampu aveasaun bele dezenvolve sai kapital Nasaun.
Area Kampu aveasaun Baucau, lokaliza iha postu Baukau vila. Fatin refere, tuir hanoin balu katak, Loloos Estadu Timor, bele uza halo sidade bot ruma. Parte ida merese sai kapital Nasaun, tanba konsidera terenu ida ne’ebé tetuk no metin, laiha mos mota bot ruma mak atravesa, ka fera iha klaran.
Enkuantu, maske iha ona hanoin hakarak muda fali kapital Nasaun ba Munisípiu Baukau, Estadu Timor – Leste, seidauk iha vizaun ofisial ruma, hodi ko’alia konaba asuntu refere.
Ligasaun ho tempu invazaun (7/12/1975), tropas Indonesia kuandu invande Baukau, ba dahuluk hatun forsa husi Lalehan iha aeroportu refere, ikus mai halo operasaun maka’as tebes ba lokalizaun Falintil nian, iha Sentru Leste tomak. *** (TTM)
Discussion about this post