Emprezariu Timoroan Ricardo Cardoso Nheu, rekoñese ho Covid – 19, ambiente bisnis iha Timor – Leste, labele la’o di’ak tanba laiha kontaktu direta mai rai laran.
“Ho Covid -19 ne’e, komunikasaun, kontaktu sira husi rai husi liur mai rai laran ladun iha. Aviaun ladun mai, otel sira laiha rendimentu. Ida ne’e, ba de’it setor ne’e, seidauk konta ho atividade komersial sira seluk”, asuntu ne’e, hato’o husi Nheu ba Time Timor iha Pantai – Kelapa, segunda (21/06).
Informasaun seluk husi emprezariu ne’e katak, maske iha Timor – Leste, empreza barak, durante Covid – 19, konsege hapara nia trabalador sira, maibé nia empreza la hapara trabador sira, tanba kuaze 95%, kontinua servisu hanesan bai – bain.
“Klaru katak pandemia ne’e, nia impaktu negativu ba ita nia ekonomia rai laran, maibe ha’u nein hasai ha’u nia trabalador ida tanba la fó impkatu bot ba ha’u nia empreza’’, Ricardo afirma.
Entretantu esperansa ida husi Timoroan ne’e ba Governu katak, presiza kria kondisaun ida ne’ebé di’ak, bazeia ba kondisaun ohin loron, hodi nune’e, bele suporta atividade komersiu ka bisnis hotu iha Timor – Leste.
Alende ne’e, husu mós ba orgaun ezekutivu, presiza fó biban maka’as ba emprezáriu Timoroan hotu, hodi haree posibilidade hodi investe ba iha area Saúde, tanba Timoroan mós bele.
Fo hanoin fali katak, depois Governu deside hapara konfinamentu obrigatoriu no Serka Sanitaria ba iha Munisipiu Dili, iha loron kinta (17/06), atividade komersial nian balun, komesa hahú fali ona, maske seidauk atinzi 100%. *****(Time)
Discussion about this post