Aman ba Partidu KHUNTO José dos Santos – Naimori Bucar, hateten partidu tuan ka foun sira, iha objetivu prinsipal ida mak hakarak povu moris di’ak. Laiha partidu ida, nunka hakarak povu moris aat.
“Iha era ukun aan ida ne’e, partidu hotu – hotu, iha mehi hakarak povo ba moris di’ak. Tanba ne’e, partidu ki’ik e bot, mesak maun alin – alin, bin, feton no Timoroan sira nian.” deskursu aman partidu Khunto, iha okaziaun aniversariu Partidu KHUNTO badala sanulu, aumesmu tempu, inaugura mós Sede Nasional ne’ebé lokaliza iha suku Manleuana Mota – Ulun, domingu(4/7).
Ho eventu sira ne’e, refleta ba loron ezistensia partidu nian, ne’ebé moris iha loron 4 fulan Jullu tinan 2011, lider KHUNTO refere, esplika katak, “Ho tinan sanulu ba kotuk, ikus mai partidu sei eziste, hodi hetan fiar husi povu, tanba KHUNTO moris tuir nia prinsipiu no valor rasik, ne’ebé hanesan, Tane O lisan, Tane O rai no tane o Emar.”
Rekoñese tan katak, KHUNTO iha tinan sanulu ba kotuk, hasoru problema oin – oin, ho pasensia ikus mai konsege hetan forsa politika, iha orgaun legislativa no ezekutiva.
Enkuantu antes ko’a fita ne’ebé akompaña direta husi Presidente Parlamentu Nasional Aniceto Guterres, hamutuk ho konvidadu importante sira seluk, Naimori husu ba militante sira no povu tomak katak, timoroan tenke kria paz no estabilidade.
“Paz no estabilidade sai ema hotu nia responsabilidade. Tanba ne’e, ha’u husu ba estrutura Nasional to’o ba base, tenke konsolida forsa, hodi ba hasoru eventu demokrasia rua, eleisaun Presidensial 2022, no eleisaun parlamentar 2023.” Nia temi hodi hakotu. ****(Time)
Discussion about this post