Lugu “Ha’u La Kandidatu Aan ba Presidente da Repúblika”

Lider rejistensia jerasaun 1975, Jose Luis Guterres “Lugu” dehan, la kandidatu aan ba presidente da Repúblika periodu 2022 – 2027, tanba sei apoiu ba lider rejistensia Kay Rala Xanana Gusmão.     

Nia dehan tan, biar iha públiku daudaun ne’e, espalla ona informasaun balu katak, sei kompete iha eleisaun Presidensial tuir mai, ida ne’e, laloos.  

“Ha’u la kandidatu aan ba Presidente da Repúblika tuir mai, tanba sei apoiu no ta’u konfiansa fali ba Lider Karismatiku Maun bot Kay Rala Xanana Gusmão. Ho nia ita bele resolve problema sira ne’ebé, ita hasoru daudaun,” klarifikasaun ne’e, hato’o ba Jornalista Time Timor iha nia Residensia, Pantai – Kelapa, tersa(07/07).

Hatan pergunta ida konaba lista kandidatu lubuk ida ne’ebé iha, no sei kompete mós iha eleisaun tuir mai, eis Frente diplomatika ne’e dehan, Timoroan hotu iha era demokrasia, bele hato’o nia kandidatura, maibé tenke iha kbi’it, hodi haree ba problema Nasaun nian, sa tan ho situasaun politika ida ne’ebé, hanesan agora daudaun.     

Nia rekomemdasaun id aba Estadu katak, ba Governu no Sistema ukun tuir mai, tenke enkaiza mós sistema ukun no bandu sira ne’ebé implementa iha tempu bei – ala sira nian, hodi nune’e, bele hatu’ur  metin liu tan ukun no bandu sira, liu –liu iha setor Justisa no seluk tan.  

Nasaun Demokratiku ka Nomarkia!

         Iha fatin ne’ebé lahanesan, refleta ba Eleisaun Pridensial tinan oin mai (2022), sidadaun Nasional ida ho naran Rufino Jesus dehan, atu hili kandidatu se – se de’it ba Presidente Repúblika periodu 2022 – 2027, tenke tuir prosesu ne’ebé demokratiku, livre, segredu, no justu.  

“Ita nia Nasaun ne’e, demokrativu ka Nomarkia, ne’ebé ita nia lider balu dehan, ha’u de’it mak vota mos, nia manan ona. Se karik nune’e, ita nia Nasaun ne’e nomarkia,” denan Rufino, ba Time Timor iha Becora.    

Tanba ne’e nia husu, se Nasaun Demokratiku regra sira ba hili Presidente da Repúblika, ka eleisaun Parlamentar hodi hili reprezentante povu iha Parlamentu, tenke demoktrativu, nune’e, kandidatu Timoroan seluk ne’ebé kompete mós, sentre orgullu maske lakon.    

“Demokrasia atu di’ak, primeiru sasan hotu tuir nia dalan. Lakon ka mana buat ketat, importante iha festa demokrasi ba hili Presidente da Repúblika tenke la’o tuir lei eleisaun nian ne’ebé Comisaun Nasional Eleisaun hatun ona.” Nia hato’o hodi hakotu. ****(Time)