Prezidenti Ezekutivu Fundasaun Cristal, Agostinho dos Santos Gonçalves, lori Instituisaun Edukativa Cristal nia naran, hato’o agradese ba apoia supresa ne’ebé, hala’o husi Organizasaun Foinsa’e Unidade Dezenvolve Futuru(FUNDEF), tanba bele tulun estudante ISC ne’ebé hasoru problema ai – han, iha tempu kalamidade, hodi funu hasoru Covid – 19.
“Agradese tebes ba apoia supreza ida ne’e, tanba FUNDEF, bele tulun ita nia estudante sira ne’ebé mak hasoru problema, menus ai – han, iha tempu implementasaun Serka Sanitária no Konfinamentu Obrigatóriu.” Lia hirak ne’e, hato’o husi Agostinho dos Santos Gonçalves ba Jornalista sira, iha kampus Cristal, bainhira FUNDEF, União Europeia, GIZ, distribui necesidade básikas, ba estudante na’in sanulu resin iha kampus Cristal,kinta(06/05).
Hatutan liutan dehan, iha tempu kalamidade ita haree atividade sira ladun la’o di’ak, no presiza tebes ita hotu fó liman ba malu, hodi tulun malu. Ita ninia apoiu sira, lapresiza haree ba kuantidade maibe oinsa motivasaun ema nia fuan diak bele ajuda malu.
Iha fatin hanesan, diretor FUNDEF, Carlos Gonçalves, esplika FUNDEF, bele realiza apoiu hirak ne’e, ba estudante Cristal, tanba servisu hamutuk ho parte União Europeia, no mos GIZ. Ba fase dahuluk identifika uluk benifisiaru sira hotu, ne’ebé presiza tebes apoiu, iha tempu Covid ne’e, ho konesimentu husi kampuz, ikus mai bele realiza programa ida ne’e.
“Apoiu ai- han ne’ebé mak FUNDEF oferese ba estudante Cristal, la’ós servisu mesak, maibé konta ho apoiu sira hotu husi GIZ, no mos União Europeia, inklui kampus ISC rasik. Ita nia apoiu ne’e, ba liu estudante sira ne’ebé presiza duni. Fiar katak, ho ida ne’e, bele hakma’an netik estudante sira nia necesidades konaba ai – han,” dehan Carlos Gonçalves hodi termina.
Fo hanoin fali katak, iha fase implemetasaun Serka Sanitária no Konfinamentu Obrigatóriu fase dahuluk nian iha kapital Dili, Governu liuhosi Ministériu Solidariedade Sosial no Inkluzaun(MSSI), hamosu ona politika ida, apoiu fós ba estudante universitariu sira, hirak ne’ebé mak hela iha kost. Apoiu ne’e, kuaze ba estudante hotu husi Instituisaun Superior sira, liu -liu iha Dili. ****(Oscar)
Discussion about this post