Dosente Cristal Tuir Formasaun Pedagójika Husi Centru Formasaun Angolana

Dosente Instituto Superior Cristal(ISC) inklui profesores husi Instituisaun Edukativa Cristal kuaze 30, tuir formasaun pedagójika ne’ebe hala’o husi Centru Formasaun Angolana rua, Universidade Oscar RIBAS(UÓR), inklui Centro Formação Saber Agregação Para Docentes Universitários(CF – Saber).  Atividade importante ne’e, realiza, liuhosi google classroom, iha kampus ISC – Balide, Dili segunda(01/03).        

João Manuel Correia Filho, nu’udar orador prinsipal ida husi CF – Saber, hatete formasaun pedagojika ba dosente universitáriu sira importante tebes, para bele organiza, koordena, difini planu estratéjiku sira, to’o halo evaluasaun ba atividade no prosesu ensinu nian.

Nia parte mós hato’o agradese wa’in ba Instituto Superior Cristal, Timor – Leste, tanba foin ba dala uluk instituisaun ne’e bele hamutuk Universidade Oscar RIBAS no CF – Saber liuhosi formasaun pedagójika.  

 “Formasaun ne’e, hamutuk ho Instituto Superior Cristal, Timor – Leste, ami konsidera hanesan edisaun Internasional. Tanba ne’e, ami agradese ba Instituto Superior Cristal tanba bele hamutuk ho  Instituisaun rua, Universidade Oscar RIBAS(UÓR), inklui Centro Formação Saber Agregação para docentes Universitárius(CF – Saber),”  João Filho hato’o ba dosente Cristal, via online mai husi Luanda – Angola.   

Entretantu, Reitor Instituto Superior Cristal, Sebastião Pereíra, dehan  hanesan dosente iha ne’ebé de’it inklui iha Timor – Leste, tenke hetan formasaun pedagójika  hodi bele hetan sertifikadu pedagójiku  tuir nivel sira.

“Konaba formasaun ida ne’e, dosente sira bele to’o nivel oitu. Tanba ne’e, formasaun hamutuk ho Universidade Oscar RIBAS no CF- Saber, parte ida hodi kapasita ita nia dosente no profesor sira, tanba Timor – Leste, seidauk iha sentru formasaun ba dosente.” Dehan reitor ba Jornalista sira, hafoin termina sesaun abertura kursu pedagójika iha kampus Cristal.

Enkuantu, diretora Ministériu Ensinu Superior Siência no Cultura, Filomena Maria Lay, apresia ba eventu formasaun pedagójika ne’ebé mak Instituto Superior Cristal realiza, hamutuk ho universidade  Oscar RIBAS no Sentru Formasaun Saber.

“Apresia tebes ba inisiativa formasaun ida ne’e, no ha’u nia sujestaun se bele kontinua habelar formasaun ida ne’e, mezmu tempu Covid maibé liuhosi eventu ida ne’e, ita bele atualiza nafatin  dosente sira nia koñesimentu, liu – liu konaba  pedagójika jestaun, avaliasaun hodi hadi’a kualidade ensinu superior iha Timor – Leste.” Diretora hato’o hodi hakotu.

Observasaun Jornalista husi media ne’e, maske iha abertura formasaun ne’e, iha problema ituan konaba liña internet nian, maibé parte teknika husi Instituto Superior Cristal, konsege  jere eventu ne’e to’o fin abertura kursu. ****(Time – Timor)

.