Husu Tulun ba Maromak Liuhosi Ilhas João Paulo II

Estudante Instituisaun Edukativa Cristal, nivel hotu, sesta(22/10)semana ne’e, realiza misa asaun grasa, hodi husu tulun ba Maromak, liuhosi reja misa ba Mahein Ilhas João Paulo Segundo, hodi nafatin bele hara’ik bensaun, kbi’it ispiritu santu nian, nune’e, atividade ensinu nian bele la’o ho di’ak.

Durante iha misa ne’e, amu kapelaun Cristal Manuel Pinto SDB, esplika katak, reja ba ilhas sira hanesan João Paulo Segundo, Inan Maria Auxiliadora, Kristu Nai Liurai, Don Bosco, ida ne’e sai fonte prinsipal husu tulun ba Maromak.

“Reja ba ilhas sira, pontu importante ne’e, intensaun ba Maromak. Maibé tenke hatene katak, Santu padre João Paulo segundo, durante sei moris, nu’udar ema domin na’in, ba ema hotu, reza mós ba ema seluk mezmu fiar lahanesan. Dala  ruma ema halo aat ba nia, koko atu oho nia, maibé latauk hodi ikus mai, buka ema ne’e, hodi fó fali perdaun ba nia. Hahalok ida ne’e, hanesan sarani – estudante tenke banati”, esplika husi amu kapelaun iha salaun enkontru Cristal, sesta(22/10).

Amu kapelaun dehan, – Ohin loron Joven barak tebes, maibé sai Joventude ne’e, ema  ituan de’it, signifika katak, Joven sira ladun hala’o nia papel ho di’ak. Sai Joventude, importante  mak hatene perdua, domin na’in, haraik aan, hodi sai mós espellu, hodi haree ba ema seluk nia di’ak.  

Ikus liu bibi atan ne’e, dehan, Santu padre João Paulo II, hadomi Timor – Leste, tanba ne’e, iha loron 12 fulan Outubru tinan 1989, konsege vizita iha tasi – tolu, Dili, mezmu tempu ne’ebá, buat balu la’o ladi’ak.

“Amu Papa hatudu domin no fuan bot ba Timor – Leste, to’o iha ne’e, hodi haree nia nia emar sira. Ukun aan ona, tenke sai ema, katolik ne’ebé tuir amu papa nia mensajen iha tempu ne’eba hatete ona, “Imi Masin Rai Nian no Imi Naroman Mundo nian” signifika sai sabor ba ema seluk nia moris, no sai Naroman signifika, hatudu hahalok di’ak, hanesan buat ne’ebé Naroman nunka subar aan iha nakukun”. Eplika hodi hakotu.    

Entretantu vice Reitor I, Jacinto de Oliveira Junior, reprezenta parte hotu  iha Instituisaun Edukativa Cristal hafoin misa ba Jornalista sira hato’o katak, alende hala’o misa asaun grasa, realiza mós programa hodi lori ilhas João Paulo II, ilhas Maria Auxiliadora, Ilha Don Bosco, Cruz Universitairu  ba vizita iha eskola Cristal nivel Munisípiu nian.

“Ba Tinan ida ne’e, depois realiza fali aula prezensial, Instituisaun Edukativa Cristal, hala’o kedas programa vizita lori mahein Fundasaun no Eskola nian ba vizita ba iha  Munisípiu ne’ebé Cristal estabelese nia eskola sira. Hahú husi Maliana, Suai, Same, Aileu, Viqueque, Baucau, ikus liu mai fali  Dili”. Hato’o husi vice reitor I. *** (TTM)