IEC Hala’o Retiru Antes Selebra Festa Natal

Instituisaun Edukativa Cristal (IEC), tersa(21/12), semana ne’e, liuhosi amu kapelaun Cristal, Pe. Manuel Pinto, SDB, hala’o retiru loron ida, ho parte hotu iha Cristal, antes selebra Festa Santu Natal 25 Desembru 2021.

Atividade ispiritual ne’e, realiza iha Salaun Cristal, Balide – Dili, envolve Presidente Ezekutivu Fundasaun Cristal, Agostinho dos Santos Gonçalves, hamutuk ho dosente Instituto Superior Cristal(ISC), profesor husi eskola nivel sira, funsionáriu, reprezentante senadu ISC, inklui mós estudante sira.

Iha retiru ne’e, amu kapelaun husu ba ema ida – idak, hanesan sarani katólika,  tenke prepara aan didi’ak, molok Jesus mai.

“Lian preparasaun katak, ezemplu atu halo festa ida karik, ita tenke prepara ho didi’ak, nune’e konvidadu  sira mai  iha festa ne’e, bele han no hemu ho di’ak. Nune’e mós, iha loron Jesus mai”, esplika husi amu kapelaun iha salaun enkontru Cristal – Dili, tersa(21/12).

Tanba ne’e, amu kapelaun hato’o katak, bainhira Jesus atu mai, iha tempu ne’eba, ema balu husu ba São João Baptista katak, Jesus atu mai ona, ami presiza halo saida?

“Imi ne’ebé iha hatais rua, ida fo ba o nia maluk ne’ebé laiha. Ida ne’ebé, iha hahán nato’on, fó mós ba maluk sira ne’ebé kuran”, lian São João Baptista, dehan husi amu kapelaun Cristal, iha eventu retiru ne’e.

Kapelaun ne’e esplika ho klean katak, Jesus atu mai, la’os de’it, ita buka apoiu material ba malu. Prezensa Jesus nian, hanorin ita perdua malu, oinsa ita apoiu moral ba ida ne’ebé presiza. Alende ne’e,  ema ida – iak tenke buka hodi halo buat ne’ebé mak loos.

“Festa Natal la’ós ita, buka hemu tua, ikus mai halo problema. Buka hatais  di’ak ka halo fali buat aat sira iha tempu Natal. Nu’udar sarani, halo buat ne’ebé, loos no justu. Signifika servisu iha Governu karik, bainhira koleta taxa, labele inventa, tanba korrupsaun ne’e, mosu ona antes Jesus mai”.

Iha fatin hanesan, hafoin retiru, Presidente Ezekutivu Fundasaun Cristal, Agostinho dos Santos Gonçalves, liuhosi esplikasaun badak ida  dehan, Natal hanesan festa familia nian, maibé tenke iha ksolok, dame, domin. Tanba ne’e, paz tenke iha ida – idak nia laran.

Tuir observasaun Time Timor nian, hafoin retiru,  amu kapelaun Cristal, realiza mós, misa asaun grasas,  hodi taka anu letivu/tinan akademiku 2021.

Intensaun prinsipal misa ne’e,  agradese ba  mahein sira husi Institusaun Educativa Cristal(IEC), no mós Fundasaun Cristal(FC), tanba durante tinan ida, atividade hotu konsege la’o ho di’ak.***(TTM)