Igreja Pentekostal Timor – Leste, liuhosi pastor Bernardo Guterres, dehan, kampana la’ós tempu ba apoiante, militante husi kandidatu Presidente 2022 – 2027 sira nian, buka hodi kria fali Instabilidade.
Nia dehan tempu kampana nu’udar momentu importante tebes ba kandidatu ida – idak, hodi hato’o sira nia programa ligasaun ho Misaun no Vizaun Presidente nian, ikus mai eleitor sira iha tempu eleisaun bele ba vota iha sira.
“Ita tenke komprende kampana ne’e, kandidatu sira sei ko’alia konaba politika saida mak sei halo bainhira assume knar hanesan Xefe Estadu. La’os ita militante sira baibain mak buka estraga malu hanesan hana malu, oho malu, tuda malu, ida ne’e krime. Se Krime siguransa sira sei atua,” kestaun ne’e, hato’o husi pastor Bernando ba Time Timor liuhosi entrevista iha nia residensia, aldeia 20 de Setembru, suku Bebonuk, postu Dom Aleixo, Munisipíu Dili, segunda loraik(28/02).
Hanesan sidadaun ida ko’alia mós katak, ba eleisaun Presidensial periodu 2022 – 2027, bele iha kandidatu hamutuk 16, maibé povu mak sei deside.
“Nasaun demokrasia atu se – se mak manan ligasaun ho kadeira Presidente nian, povu mak sei determina. Maibé importante mak labele trai fali konfiansa povu nian bainbira hetan fiar iha tempu eleisaun”, nia hato’o hodi hakotu.
Ikus liu partor ne’e dehan, paz no estabilidaed nia folin karun, tanba ne’e, Timoroan sira mak tenke sai autor ba paz no estabilidade ne’e rasik.
Entretantu iha loron 1 fulan Marsu 2022, tuir informasaun ne’ebé Time Timor asesa, kandidatu lubuk ida, desloka ona ba Munisipíu sira, inklui RAEOA, Maske nune’e, kandidatu balu iha Munisipíu hanesan maibé postu mak lahanesan. Tama ba loron 2 fulan Marsu 2022, kandidatu ida – idak, bele hala’o kampana to’o loron ne’ebé determinadu. **** (TTM)
Discussion about this post