Sekretária Estadu Igualidade no Inkluzaun, liuhosi Xefe Departamentu Formasaun José de Carvalho, hateten Baucau sai ezemplu ba Lautém, tanba iha eleisaun suku foin lalais, feto na’in lima mak eleitu nu’udar xefe suku, kompara ho Munisipíu Lautém, laiha kandidatu feto ruma mak sai nu’udar lideransa suku nian.
Nia dehan tan, feto Lautém oan sira, labele eleitu ba autoridade suku iha eleisaun liuba, fator ida sistema patriakal kontinua domina, liu –liu parte foti desizaun ninian.
“Iha Baucau feto na’in lima mak eleitu. Enkuantu Lautém feto ida mós laiha. Fiar katak iha eleisaun sira tuir mai, Lautém nia situasaun bele muda ona, tanba Baucau hatudu ona ezemplu”, xefe Departamentu hato’o asuntu ne’e, bainhira sai orador hodi partisipa iha debate “Feto iha Kareira” ne’ebé organiza husi AJTL, iha ambitu komemorasaun ezistensia asosiasaun nian ba dala 22, ne’ebé hala’o iha otel Luz Clarita – Dili, kuarta(21/12).
Diretor mós hato’o katak, iha tinan 2022, 2023, 2024 to’o ba 2025, nu’udar tinan eleisaun ninian. Ho ida ne’e, parte Sekretária Estadu Igualidade no Inkluzaun, servisu maka’as tebes, hodi tu’un ba base, identifika feto potensia sira hotu, hahú husi suku, to’o munisipíu halo promosaun ba sira, hodi bele mós kandidata aan ba funsaun sira iha suku, to’o mai Nasional.
“Durante ne’e, ita identifika ona feto potensial sira, hodi promove sira, maibé tenke liuhosi formasaun. Ita mós servisu hamutuk ho partidus politikus sira, liu –liu iha festa demokrasia mai, atu hili Presidente da Repúblika, husu ba Partidu sira mós, tenke apresenta lista kandidatura feto nian”, nia hato’o hanesan orador.
Entretantu iha debate ne’ebé Asosiasaun Jornalista Timor Lorosaé(AJTL), organiza ne’e, jornalista feto sira husi radio, tantu eskrita nian, husu ba Feto Timor Lorosa’e oan tomak, tenke hanoin iha ulun katak, feto no mane iha oportunidade hanesan, hodi partisipa iha kualker aspeitu dezenvolvimentu Nasaun nian inklui mos iha parte foti dezisaun.
Sira nia deklarasaun ida katak, Inan – feton sira labele kontinua hanoin katak, feto nia kna’ar mak iha de’it uma, tein no kuidadu labarik.
“Feto Timoroan hotu tenke esplora didi’ak oportunidade. Labele hanoin de’it oinsa sai inan, maibé buka oinsa atu promove aan liuhosi kareira. Maibé tenke buka dalan di’ak. Dalan ida mak liuhosi edukasaun formal no maun formal”. Deklasaun kompremisiu iha debate ne’e.***(ttm)
Discussion about this post