Vizita ISC: Horta Hala’o  Dialogu ho Reitor no Dosente Foka ba Merkadu Traballu

Iha loron 10 fulan Novembru tinan 2022, mais ou menus tuku rua- loraik, liu minutu sanulu, otl, Presidente da Repúblika Dr. José M. Ramos Horta, ho komitiva, hala’o vizita ba iha  kampus sentral Instituto Superior Cristal(ISC), Balide – Dili.

Presidente nia vizita ba ISC, no Instituisaun Edukativa Cristal, simu direta husi Presidente Ezekutivu Fundasaun Cristal Dr. Agostinho dos Santos Gonçalves, hamutuk ho Reitor ISC, Dr. Sebastião Pereira, korpo dosente, diretor ES Cristal Rafael Sávio inklui alunu sira nivel ensinu Sekundáriu simu Presidente ho Banda Muzika Cristal.   

Bainhira to’o iha kampus Cristal, Presidente mós konsege vizita ba labóratóriu Fakuldade Siencia Saúde no Siencia Edukasaun ISC nian, hodi haree besik liu tan kondisaun ne’ebé mak iha.

 Entretantu, durante hala’o dialogu entre parte rua, Presidente husu ba ISC iha futuru mai, presiza haree ona dalan di’ak sira, oinsa  bele prepara rekursu humanu ne’ebé kualifikadu, no la’os de’it bele kompete iha nivel merkadu lokal nian, maibé mós envolve iha merkadu trabalu liur tanba Mundu ohin loron dezenvolve ho lais tebes iha parte hotu – hotu, tantu IT no seluk tan..

“Ba futuru presiza haree oportunidade sira ne’ebé bele akumula ita nia rekursu, la’os de’it servisu no kompete iha Merkadu lokal, maibé mós ita prepara aan ba merkadu iha rai liur ninian, tuir necesidade. Maibé atu hatene necesidade saida mak Nasaun avansadu sira presiza, tenke liu husi peskiza ruma hodi hatene didiak,” Horta nia lian iha Kampus Sentral Instituto Superior Cristal, kinta(10/11).  

Iha Dialogu ne’e, Horta hato’o rekomendasaun ida katak, di’ak liu mak aprofunda formasaun iha parte emfermagen nian, tanba Nasaun bot sira hanesan Australia, Eropa, Korea, China sira presiza rekursu sira ne’e, hodi hala’o atendimentu ba ferik no katuas sira.  

Parte ida Horta mós promete ona katak, sei ko’alia ho Governu, liu –liu Ministériu Edukasaun parte Enisnu Superior nian hodi haree oinsa bele  apoiu di’ak liu tan Ensinu Superior Privado sira la’os de’it UNTL.

“Ha’u sei ko’alia no lobi ho parseiru sira, inklui Governu hodi haree oinsa apoiu fasilidade no equipamentu ba Instituisaun akademika ensinu superior privadu sira. Alende ne’e husu ba Ministériu Edukasaun presiza tebes hasa’e montante osamentu husi 10 % to’o 30 % ba dezenvolvimentu Setor Edukasaun.” Horta ko’alia iha Kampus Cristal.  

Enkuantu Reitor ISC, Dr. Sebastião Pereira, rekoñese durante tinan 21 ezistensia  Instituto Superior Cristal(ISC), hetan ona akreditasaun ba programa lubuk ida hahú husi tinan 2008 to’o 2022, no konsege produs ona rekursu umanu iha parte Parte Edukasaun no Saúde nian,  maioria husi rekursu sira ne’e, kontribui ona ba iha prosesu dezenvolvimentu Nasional.

Hamenus konflitu presiza kria animasaun no Desportu

Presidente Ezekutivu Fundasaun Cristal Dr. Agostinho dos Santos Gonçalves, iha Dialogu ne’e, husu ba Presidente da  Repúblika, oinsa servisu hamutuk ho parte hotu hodi haree ba problema konflitu sira, entre joventude iha bairo tanba joven mak futuru ba Nasaun.

“Ikus – ikus ne’e, ita nia joven sira baku malu, oho malu ita haree ida ne’e, triste tebes. Maibé ita mesak Joven katólika. Tanba ne’e, husu ba Nai Presidente se bele hala’o Desportu iha fatin – fatin. Kuandu  joven sira koñese malu, halimar hamutuk iha desportu sei minimiza konflitu. Dala ruma kuandu viziñu de’it la koñese malu ida ne’e bele problema,  iha mós konflitu,” hato’o husi Agostinho, hanesan preokupasaun ba kestaun paz.

Antes Presidente Horta, husik hela Instituisaun Edukativa Cristal, edukador inklui dosente ISC balu,  hato’o mós preokupasaun sira ba Presidente hodi husu atu hadi’a kestaun saláriu. Husu mós hadi;a kestaun estatuta profesores kontratadu sira, inklui sujere hanoin ba  Presidente atu ko’alia ho Governu, haree ba intensivu hodi fó ba edukador sira.

Tanba ne’e, Presidente mós promete alende buka solusaun ba problematika iha setor edukasaun, iha mehi ida hakarak eskola hotu transforma ba Mundu digitalizasaun.

“Ha’u sei ko’alia ho Governu,  hakarak ita nia eskola sira ba ona digitalizasaun hanesan akontese iha rai seluk. Ita nia setor edukasaun labele kontinua iha kotuk. Ita mos presiza tau atensaun ba labarik sira hotu, tenke asesa ba pre – eskolar. ida ne’e tenke, tanba bainhira ba ona ensinu básiku,  sira bele ona hatene hakerek no koñese letra, iha mentalidade ne’ebé prontu, bele ko’ala no seluk tan.” Presidente hato’o hodi hakotu. *****(TTM)