Manan Tender Abandona Projetu

Projetu lubuk ida abandona antes eleisaun Antesipa iha tinan 2017.  Depois eleisaun antesipa kompania lubuk ida mós,  manan tender husi Governu ba hadi’a Estrada – Drainazen, iha kapital Dili no munisipíu sira,  maibé ikus mai lakonsege finaliza obra ho razaun ida – idak nian.

Tanba ne’e, sidadaun balu dehan, iha Kapital Dili de’it, Estrada sira hanesan Bebonuk, Ailok laran, no Estrada  Manleuana husi parte bualaran ninian, difikulta movimentu transporte públiku no privadu, liu –liu iha tempu udan. Situasaun seluk,  tempu bai loron hamosu rai u’ut afeta saude públika.

“Presidente da Repúblika dekreta katak, iha loron  21 fulan Maio 2023, ita sei ba hala’o eleisaun legislativas, maibé projetu Governu nian barak abandona. Lahatene parese Governu foun mak sei resolve fali, hodi kontinua projetu sira ne’ebé abandona hela ne’e”, hato’o husi komunidade balu iha area Manleuana – Dili.

Nia deha tan, Estrada balu klo’ot ona depois iha kompania balu hadi’a derepente, dehan dada fiu, monta kanu, sobu tiha husik de’it, udan mai be’e nalihun iha Estrada laran. Loloos na’in ba obra, Governu tenke kontrala. Agora buat ki’ik de’it, ita halo labele sa tan obra bot sira seluk.

Tanba ne’e, Francisco da Silva husu ba CAC, Parlamentu Nasional, asuntu infraestrutura atu halo investigasaun ba obra sira ne’ebé laiha kontinuasaun.

“Lahatene parte kompetente sira ne’e, fiskaliza ka la’e, espesialmente asuntu infaestrutura. Projetu barak iha kedas ita nia matan laran, maibé laiha ema ida halo kazu. Osan povu nian ne’e, konta habokur loos de’it grupu balu, nia benefisiu ba povu ne’e, ki’ik liu. Depois tempu kampana mak partidu sira mak ko’alia mesak furak, dehan nia lahalo, ha’u de’it mak halo”. Nia hato’o ho di hakotu.

Haree ba problema ne’e, reprezentante povu iha Parlamentu Nasional espesialmente parte infaestrutura ninian rekoñese failansu sira ne’e, no promete sei haree problema sira ne’e ho seriu tanba durante ne’e, projetu bot no ki’ik lubuk ida mak abandona, maske preve montante osamentu ne’ebé bot.

“Ita be’e kaer projetu ne’e, labele hanoin de’it atu manan. Pelu menus halo buat di’ak ba durasaun ne’ebé naruk. Se hanoin liu lukrutivu tinan ba tinan ita mak nune’e nafatin. Portu Tibar sai ezemplu no di’ak ba ita iha tempu agora no futuru”. Lian komisaun Infaestrutura Parlamentu Nasional, fulan Febereiru 2023.

Enkuantu problema sira ne’ebé media ne’e identifika iha ema balu hela iha rai Estadu maibé halo impedimentu ba projetu Drainazen, nune’e husu indeminizasaun ida ne’ebé bot, liu fali kapasidade kompania kaer obra nian.Alende ne’e, obra balu kona iha area no uma komunidade nian nune’e, iha mediasaun maibé laiha solusaun hodi impende obra.

Maske nune’e, parte Ministeríu  Obras Públiku, autoridade lokal, familia afetadu sira reuni iha sede aldeia haree ba asuntu ne’e, maibé  kazu balu laiha duni solusaun ho razaun lubuk ida.***(TTM)