Kandidatu Programa Mestradu ISC  – Hala’o  Orientasaun Tinan Akademiku 2023

Diretor  Programa Mestradu,  Instituto Superior Cristal(ISC) Dr. Augosto da Costa, hateten kandidatu foun programa mestradu, iha Instituto Superior Cristal(ISC), hamutuk hat nulu resin hat(44), iha kursu espesialidade  rua, Jestaun Edukasaun no Teknologia Edukasaun, hala’o orientasaun tinan akademiku 2023.  

Atividade orientasaun ne’e, hala’o iha kampus Programa Mestradu,  Instituto Superior Cristal(ISC), Balide – Dili, domingu(26/02).

Tuir Augosto, orientasaun ne’ebé realiza ho objetivu prinsipal ida oinsa maka, kandidatu programa mestradu tinan akademiku 2023, bele hatene prosesu tomak ligasaun ho prosesu estudu, kriteria sira, inklui instrumentu hotu ne’ebé presiza, nune’e bele fasilita di’ak liutan prosesu ensinu durante tinan rua nian laran.

“Orientasaun ne’e hamutuk ho kandidatu sira  iha  turno da neen ona, ba iha kursu espesializasaun rua, Jestaun Edukasaun no Teknologia Edukasaun. Total husi kandidatu hotu hamutuk hat nulu resin hat(44),” hato’o husi diretor progama mestradu ISC, ba media nasional liuhosi entrevista badak, hafoin abertura orientasaun 2023, ne’ebé loke diretamente husi Presidente Ezekutivu Fundasaun Cristal Dr. Agostinho dos Santos Gonçalve MM, hamutuk ho Reitor ISC, Dr.  Sebastião Pereira MM, iha salaun Enkontru programa Mestradu Cristal – Balide,  Dili.  

Tuir diretor programa mestradu ISC, orientasaun foka liu ba informasaun,  kriteria – obrigasaun, kandidatu sira  nian iha prosesu ensinu.

Fatin hanesan kandidatu foun husi kursu Jestaun Edukasaun, Hipolito da costa, nu’udar reprezentante husi  kandidatu seluk  dehan, Orientasaun ne’ebé sira hala’o, hodi bele hetan informasaun, no instrusoes balu, ligadu ho prosesu estudu nian.

‘’Orientasaun ida ne’e, alen bele koñese ambiente kampus,  hetan mós informasaun no orientasaun sira, liga direta ba kadidatu ida – idak nia area estudu. Ami hala’o mós diskusaun balu hodi haklean informasaun sira relasional ho prosesu estudu nivel mestradu iha kampus ISC,” hato’o husi Hipolito.

Nu’udar kandidatu ba kursu mestradu, Hipolito sente kontente hodi rekoñese dehan, presiza aumenta abilidade, koñesimentu, liuhusi kursu ne’ebé estabelese iha Instituto Superior Cristal, tanba edukasaun, nu’udar save importante ba dezenvolviemntu Nasional.

Parte importante ida antes hala’o abertura ba orietasaun ne’e, Reitor Instituto Superior Cristal Dr. Sebastião Pereira,MM husu ba estudante  foun programa mestradu ISC, tinan akademiku 2023, tenke halo esforsu barak, hodi hakerek no hala’o peskiza tuir ida – idak nia area estudu.

Intervensaun importante ida husi Presidente Ezekutivu Fundasaun Cristal Dr. Agostinho dos Santos Gonçalves, MM hato’o espetativa ida hodi husu ba kandidatu hotu katak,  hala’o ona orientasaun konserteza sai ona estudante iha ISC, maibé atu termina kursu, tenke ativu, no ida – idak hanesan kandidatu sai mos ema Inovativu, Suportivu no Creativu iha prosesu estudu nia laran.

“Parabens ba imi, ohin bele hala’o orientasaun ho objetivu bele koñese malu ho dosente sira, entre estudante ho estudante, no hatene mós ambiente iha kampus ISC. Maibé atu termina kursu ka termina estudu tenke ho i vontade,  prezensa tenke 75 %.”. Hato’o husi Presidente FC, antes hala’o abertura orientasaun tinan akademiku 2023. **** (TTM)