07/09/2026. Mandatu Prezidente Repúblika Periodu ne’e, sei termina iha fulan Marsu tinan 2027. Tan ne’e iha Timor – Leste, dadaun ne’e iha ona kandidatu Timoroan lubuk ida(Mesak kandidatu Potensial), balu mai husi Lider Rejistensa Armada nian, inklui jerasaun foun lubuk ida mai husi Organizasaun Rejistensia.
Ligasaun ho asuntu ne’e, opiniaun maioria dehan, posibilidade Jeneral reformadu Sr. Lere Anan Timur, mak sei avansa ba kargu Prezidente da Repúblika, iha periodu tuir mai tanba iha espetativa balu dehan, Lere Anan Timur lider Rejistensia Armada, alende iha kapasidade, Integridade, Honestidade, merese hodi bele lidera lai Nasaun ida ne’e, liuhusi kargu Prezidente antes fó fali ba Jerasaun foun sira iha periodu tuir mai.
Maske nune’e, idea balu hanesan esteitmentu Politika hato’o ona katak, posibilidade mós atúal Xefe Estadu agora (Dr. José Ramos Horta), mak sei kontinua avansa ba kargu ida ne’e, tanba iha tinan 2029, Timor – Leste, sei asume kargu importante balu iha Organizasaun ASEAN.
“Se karik bainhira Dr José Ramos Horta hakarak dala ida tan kompete iha Eleisaun Prezidensial tuir mai, ami kontinua apoiu ba nia kandidatura tanba iha tinan 2029, Nasaun ne’e sai uma Nain ba reniaun ASEAN nian”.
Entrevista balu ne’ebé hala’o husi media ne’e, hamutuk ho kandidatu balu, nu’udar Jerasaun foun esplika katak, tempu ona ba Povu ida ne’e, ho konsensia politika, hodi bele hili no fó apoiu ba Jerasaun foun, hodi ba asume Kargu Prezidente da Repúblika tanba Jerasaun rejistensia 74 – 75, sira nia kontribuiasaun ba Nasaun ne’e bot tebes, nune’e, jerasaun foun sira mak tenki kontinua hikas hodi lidera Nasaun ne’e, hahu agora.
“Ita respeita tebes ita nia aman sira. Klaru katak, ita bele iha hanoin sira, prediksaun sira, dehan kandidatu ida ne’e mak sei avansa maibé keta haluha katak, desizaun iha Povu nia liman. Tempu ona ba jerasaun foun ne’ebé iha kapasidade hodi lidera mós Nasaun ne’e, liuhusi kargu Prezidente da Repúbliku nu’udar simbolu Unidade Nasional no Prezidente ida ba Povu tomak la’os reprezenta fali grupu politika balu”. Asuntu ne’e, hato’o husi sidadaun balu, ne’ebé hakarak mós kompete iha eleisaun Prezidensial tuir mai.
Enkuantu sidadaun ki’ik balu esplika katak, iha Nasaun ne’e, se – se de’it bele aprezenta sira nia kandidatura, hodi bele kompete iha Eleisaun Prezidensial nian, maibé parte ida mós atu liu ou la’e, tenki hetan mos tula liman, tanba prova hatudu ona Kargu Prezidente sira balu liu ba, só bele tula liman husi lider Rejistensia balu, ikus mai bele hetan konfiasa husi Povu Maioria.
“Ita bele iha kandidatu barak tanba Demokrasia, maibé baihira kandidatu ida, atu liu ou hetan konfiansa ba kargu PR, nia mós tenki hetan suporta no tula liman husi Sr. Kay Rala Xanana Gusmão. Se la’e araska hotu”. Hato’o hodi hakotu.
Discussion about this post