Estudante Cristal Simu Vacina Sinovac ho Kontente

Kuarta dadeer (23/06) semana ne’e, estudante Timoroan husi Instituisaun Edukativa Cristal(IEC) hahú husi nivel ensinu sekundáriu, ensinu Superior, funsionariu sira, dosente no Reitor Instituto Superior Cristal(ISC), Sebastião Pereira ho kontente, simu vacina Sinovac, ne’ebé hala’o husi equipa vasinasaun husi Ministeriu Saúde parte Dili ninian.      

Relasiona ho vacina ne’e, Reitor Instituto Superior Cristal, Sebastião Pereira husu ba Estudante Cristal nivel hotu, inklui funsionariu tomak ne’ebé seidauk simu vacina iha fatin seluk, bele hola parte, ikus mai bele priense rekezitu husi parte Edukasaun ninian, hodi hala’o hikas prosesu aprendizajen prezensial.     

“Ami sente kontente ho vacina ida ne’e. Maibé   husu ba estudante Cristal nivel tomak, inklui parte hotu iha Cristal katak, dalan bele prevene aan husi Covid – 19, tenke vacina. Se ema hotu – hotu vacina ona, bele hahú aula prezensial”, lian reitor ISC, antes simu vacina Sinovac husi equipa Vasinasaun iha eskola Cristal – Balide, kuarta (23/06).     

Fatin hanesan Presidente Fundasaun Cristal Agostinho dos Santos Gonçalves hateten, ho vacina Sinovac ne’ebé hala’o iha Institusaun Edukativa Cristal hanesan momentu importante tebes ba estudante ne’ebé atinzi ona tinan 18.

“Ba estudante sira ne’ebé atinzi ona tinan 18, tenke vasina maibé ba estudante sira ne’ebé tinan seidauk to’o, eskola sei kria kondisaun ijiene nune’e, bele halo prevensaun.,” dehan presidente ezekutivu bainhira entrevista ho jornalista sira

Tanba ne’e, nia mós husu ba estudante Cristal sira ne’ebé tuir ona vasina Sinovac iha fase dahuluk, ba premeira doze, tenke hatutan fali informasaun ba kolega sira seluk ne’ebé seidauk vacina, hodi vasina ba prevene aan husi Covid – 19.  

Entretantu diretor saúde Publiku Carlito Freitas, ne’ebé representa Ministériu Saúde relata katak, ho vacina ne’ebé durante ne’e, hala’o nia Munisipiu Dili, konsege hatun ona númeru positivu Covid – 19, espesialmente ida Dili.

“Ho Vacina ne’ebé Governu sosa no implementa, husi loron ba loron konsege hatun ona númeru Covid – 19 iha kapital Nasaun.  Tanba ne’e ba estudante hotu iha Cristal, hanesan mós sidadaun, labele fiar ba rumoris sira ne’ebé mak espalla”. Lian diretor iha okaziaun antes abertura ba vasina iha Cristal.

Tuir informasaun ne’ebé Jornalista Time Timor asesu, estudante Cristal kuaze rihun hitu resin mak sei sei simu vacina Sinovac, husi parte equipa Vasinasaun, antes reativa fali eskola. ****(Time)