Ema ne’ebé iha ona esperensia di’ak konaba Saúde, kompostu Rui Maria de Araújo, Nelson Martins, inklui Sergio Lobo, husu ba parte servisu Ministerial hotu ne’ebé destaka iha Liña Fronteira espesialmente ho provinsia Nusa Tenggara Timur – NTT – Indonesia, atu kontrola movimentu illegal sira hotu ho rigor, nune’e, bele funu hasoru Variante Delta, labele tama mai Timor – Leste.
Sira mós halo komparasaun ida iha programa Grande Entrevista ho parte GMN iha loron tersa – kalan(07/07)deskobre katak, Corona virus nia invazaun dahuluk, mai husi ema ne’ebé tama illegal iha parte Suai, tanba ne’e, Governu tenke uza referensia ne’e, hodi prevene mós, virus sira seluk labele tama mai rai laran.
“Ita bele dehan, Covid – 19, tama mai Timor, tanba akontese movimentu illegal husi NTT – Indonesia mai teritorio nasional. Ida ne’e akontese, tanba menus kontrola iha momentu ne’eba. Kompara fali ho Nasaun viziñu Australia, perigu ladun iha, tanba bele kontrola iha Aeroportu,” lian debate GMN (07/07).
Sira hotu nia rekomendasaun iha debate refere, husu ba sidadaun nasional hotu tenke vacina, hanesan dalan di’ak liu, hodi bele hakotu ka hamenus tiha korente transmisaun Covid – 19, ho modelu saida de’it, nune’e bele tama ba situasaun new normal iha Timor – Leste.
“Atu hasa’e ema nia imunidade kontra moras Covid – 19, no hado’ok husi virus modelu saida de’it ema hotu tenke vasina. Alden ne’e, ema ne’ebé husi liur mai rai laran, tenke aplika kuarentena ba sira. Karik ida ne’ebé negativu mak bele fó autorizasaun hodi serkula.” Lian rekomendasaun.
Entretantu ligasaun ho prevensaun ba variante Delta, iha loron segunda(06/07), deputadu balu iha Parlamentu Nasional liuhosi deklarsaun politika, husu ba Governu atu taka total Fronteira no Aeroportu. Karik só bele autoriza de’it transporte ka movimentu ne’ebé necesariu, bazeia ba necesidade ne’ebé mak urgente.****(Time)
Discussion about this post