Presidente Asosiasaun Nasional Produtor Fini Komersial Timor – Leste(Anaprofiko – TL), Ilidio M. Mendonça, hateten hodi bele reforsa vizaun estratejika asosiasaun nian konaba oinsa akumula no empodera fini komersial iha Timor – Leste, no influensia politika fini Nasional ho kualidade di’ak ba kresimentu fini no garante soberania fini no seguransa ai – han iha Timor – Leste , hahú tinan 2023 to’o 2027, sei uza matadalan rasik, tanba antes ne’e, uza matadalan tuan(tradisional/Subsistensia), hodi produs fini komersial sira iha Timor – Leste.
“Hahú tinan 2023 to’o 2027, asosiasaun sei uza nia matandalan rasik, hodi hadia no orienta ba kualidade inklui hasa’e kuantidade produsaun fini sira mak hanesan, batar ho tipu Noi Mutin, Nai, no Sele. Fini Hare Nakroma, Fore – rai Utamua, fore Mungu(kiukai,lakateu, delta no merpati), Fore Keli, ai- farina(ai – uka 2 no 3), fehuk midar (hoho rai 1, 2 no 3), fore mutin no fore metan. Nune’e bele garante siguransa ai – han iha rai laran”, esplika husi Ilidio iha nia knar fatin Faulara, Dom Aleixo, Dili, tersa(21/02).
Ilidio esplika ho klean katak, matadalan ne’ebé iha ona tempu badak sei uza, tanba Asosiasaun servisu hamutuk ho CRS, liuhusi programa farmer to farmer konvida peritu Fini, “George Scotch” husi Estadus Unidos America(EUA), hamutuk ho Anaprofiku tu’un to’o ba base(Munisipíu Aileu, Manufahi, Losplaos, Manatuto) iha inisiu fulan Febereiru 2023, halo identifikasaun lubuk ida hamutuk ho grupu asosiasaun nian, ikus mai konsege produs ona matadalan proprio ho objetivu prinisipal, bele haforsa di’ak liu tan misaun – vizaun Anaprofiko iha futuru ligasaun ho fini kualidade no aumenta kuantidade fini nune’e iha futuru se barak ona bele fan iha merkadu internasional tuir estandar no iha kualidade di’ak.
Laktaro sai Dezafiu ba Produsaun batar iha Timor – Leste
Informasaun adesional ida husi Presidente Anaprofiko – TL dehan, bainhira peritu George Scotch husi Estadus Unidos America(EUA), hala’o konsultasaun ho peskiza ba iha munisipíu, sente preokupa ho pesti ka ular Laktaro – tentara ne’ebé estraga plantasaun batar ninian.
“Ita nia problema ida mak ular Laktaro, ema bolu ular tentara ne’ebé estraga plantasaun batar. Grave liu iha parte Manatuto -Natarbora ninian, segundu mak iha Munisipíu Ainaro, inklui munisipíu sira seluk iha Timor – Leste,” esplika husi Ilidio.
Tanba ne’e, Ilidio dehan, asuntu Laktaro, sai mós preokupasaun ida husi voluntáriu George, nune’e, fila ba America sei buka solusaun balu(buka ia – moruk), ikus mai liuhusi asosiaun sei minimza tuir posibilidade.
“Sim Laktaro sai hanesan impedimentu ida liu –liu ba produsaun batar iha Timor – Leste. Ita mós hamutuk ho perigu ne’ebé mai iha ne’e, nia promete sei ba America hodi haree ba asuntu ne’e, ikus mai bele liuhusi rekomendasaun sira ba asosiasaun hodi kombate ou minimiza peste laktaro iha Timor – Leste”. Hato’o husi Ilidio hodi hakotu. *** (TTM)
Discussion about this post