Diretor ONG Forum Tau Matan (FTM) Eduarda Martins Gonçalves dehan, laiha postu saúde permanente ruma iha suku Uaimori, ne’ebé partense ba postu administrativu Viqueque, Munisipiu Viqueque, parte servisu saúde Munisipíu nian, dadaun ne’e, temporaria uza hela bibleoteca ki’ik ida ne’ebé, harii iha mandatu Presidente da Repúblika José Manuel Ramos Horta, hodi hala’o atendimentu ba sidadaun sira ne’ebé, presiza asistensia saúde.
Nia esplika tan tanba laiha duni postu saude permanente iha Uaimori, ikus mai ONG Forum Tau Matan, halo proposta ida hodi diriji ba embaixada Japaun iha tinan 2021, ikus mai embaixada Japaun liuhusi fundu Asistensia ba Seguransa Umana ba komunidade Sira area Rurais (GGP), konsege tulun osan kuaze $ 92,556, hodi bele konstrui tan postu saude foun ba komunidade suku Uaimori.
Tanba ne’e, iha loron 25 fulan Marsu 2022, embaixador Japaun ba Timor Leste, Masami Kinefunhi asina ona kontratu ho ONG Forum Tau Matan, hodi bele hala’o prosesu konstrusaun ba postu saude foun iha Uamori.
Diretora dehan – Hodi garante konstrusaun postu saúde ne’ebé adekuadu, maka FTM rasik la servisu mesak maibé iha koordenasaun no konsultasaun ho parte Saúde Munisipiu nian, inklui autoridade lokal sira, hodi bele garante servisu ida di’ak.
Enkuantu dadus ne’ebé Time Timor asesa iha embaixada Japaun, iha loron sesta(25/03) okaziaun asina Fundu GGP, FTM apresenta mós Video badak konaba bibleoteca sai postu saúde, iha ne’ebé situasaun real hatudu, fatin refere, alende uza ba atende moras, sai mós hela fatin ba mediku, no utiliza mós hanesan sala administrasaun ninian.
Haree ba apoiu no kooperasaun entre FTM no embaixada Japaun, vice Ministru Saúde Bonifacio dos Reis Mau – Coli dehan, agradese ba parte hotu, liu –liu ba povu no Governu Japaun, tanba liuhosi nia embaixada iha Dili, bele tulun ona Governu Timor – Leste, hodi konstrui tan postu Saúde foun iha suku Uaimori.
“Agradese ba embaixador ekstraordinario Japaun ba Timor – Leste, inklui povu no Governu Japaun bele tulun povu Timor – Leste, espesialemnete hakma’as komunidade Uaimori nia problema. Sira sei moris saúdabel, tuir planu estratejiku 2011 – 2030”. Lian vice Ministru liuhosi nia palestra iha embaixada Japaun, Dili, sesta (25/03).
Intervensaun husi embaixador Japaun ba Timor – Leste, Kinefuchi antes asina fundu GGP, dehan apoiu ne’e, nu’udar fundu GGP ba tinan 2022, iha ne’ebé alende konstrui postu Saúde iha Uaimori, konstrui mós postu Saúde foun iha suku Balibar, ne’eb’e lokaliza iha postu Cristo – Rei, Munisipíu Dili ho osan ba projetu kuaze $ 92, 592, ne’ebé responsabiliza husi ONG HADESTA. *** (TTM)
Discussion about this post