Iha loron 5 fulan Juñu 2021, Instituisaun Edukativa Cristal, no Fundasaun Cristal kompleta ona nia ezistensia ba dala 37.
Ho idade ne’e, Reitor Instituto Superior Crital, Sebastião Pereira, fó agradese ba parte hotu, espesialmente fundador sira, tanba ho esforsu oin – oin, instituisaun edukativa ne’e, ikus mai tulun joven sira iha area edukasaun, hahú kedas husi nivel ensinu básiku, to’o ensinu superior.
“Agradese ba kontribuisaun hotu, liu –liu esforsu husi fundadores sira ne’ebé dezde hari’I liuhosi prosesu ida difisil. Tanba ne’e, loron ida ohin, ho ezistensia fundasaun nian ba tinan 37, kontinua hala’o nia kna’ar iha area edukasaun. Parabens, tanba ho kontribuisaun tomak liu –liu dosente, profesor sira, atividade edukativa kontinúa la’o ho di’ak, hodi oferese edukasaun ba Timoroan sira,” lian Reitor ISC ba Jornalista, hafoin encera misa virtual ne’ebé preside husi amu kapelaun Cristal, Manuel Pinto, SDB, iha salaun micro teacing, Cristal – Balide, Dili, sabádu(5/6).
Iha fatin hanesan José Barreto Gonçalves, nu’udar fundador ida husi fundador sira seluk, dehan iha tinan tolu nolu resin hitu ba kotuk(5/6/1984), hamutuk ho fundador sira seluk, maske iha situasaun difisil, maibé iha hakarak ida, buka tulun Timoroan(joven feto – mane),hodi bele hetan edukasaun iha nivel formal.
“Tempu ne’eba ami nu’udar antigus alunus salesiano nian, iha ispiritu Don Bosco maske tempu difisil, maibe iha inisiativa forte halibur ideas, oinsa tulun joven sira liuhosi edukasaun formal, nune’e bele iha kapasidade ka skill, hodi bele hadi’a sira nia moris,” dehan husi fundador ne’e.
Observasaun Jornalista Time Timor iha eskola Cristal – Balide, Dili relasiona ho loron ezistensia ne’e, komisaun organizadora eventu parte Instituto Superior Cristal dehan, kada tinan – tinan, sempre iha atividade sira, hodi komemora eventu ne’e. Maibé ba tinan ne’e, tanba Covid – 19, laiha atividade certame, atividade desportiva, inklui atividade animativa sira seluk. ***(Time)
Discussion about this post