Loron 12 fulan Outubru, hanesan okaziaun husi prezensa maktoban sua santidade João Paulo segundu, iha Timor – Leste, iha tinan 33 ba kotuk(1989- 2022). Tanba ne’e, Instituisaun Edukativa Cristal(IEC), realiza ona misa asaun grasa ida hodi agradese ba Maromak iha loron 12 outubru foin lalais. Relasiona ho fulan Outubru hanesan fulan Rosario, no iha fulan Novembru hanesan fulan ba Kristu Nai Liurai, Mahien ba Instituisaun Edukativa Cristal, alumni Cristal, estudante ativu sira, edukador sira, realiza peregrinasaun ba Munisipiu sanulu resin resin hat hahú husi Munisipiu Aileu iha loron 12 fulan Outubru 2022.
Jacinto Junior, nu’udar presidente Klibur alumni Cristal dehan, atividade vizita husi illas São João Bosco, Kristu Nai Liurai, Inan Maria Auxiliadora, ho objetivu primeiru vizita eskola Cristal nian iha Munisipíu hotu, inklui vizita sarani iha ida- idak nia Munisipíu, hodi halo adorasaun, reza ba paz, domin, iha rai laran, inklui intensaun ba situasaun funu iha Ukraina no Rusia signifika paz ba Mundu tomak.
Presidente Ezekutivu Fundasaun Cristal Agostinho dos Santos Gonçalves, dehan illas sira ne’e, la’os Fundasaun no Estudante Cristal nian mesak de’it, maibé ida ne’e, partense ba sarani ida – idak no povu Timoroan sira nian, liu –liu hirak ne’ebé fiar nu’udar sarani katólika.
“Vizita illas ne’e, la’ós partense ba ema ida nian, maibé sarani sira nian. Nain feto Auxiliadora, João Paulo Segundo, sarani hotu nian tanba ne’e, vizita ba munisipíu sira, sarani liu –liu estudante sira tenke reza hodi bele hetan grasa sira, sai estudante ne’ebe di’ak, hodi hado’ok husi hahalok aat sira,” hato’o husi Presidente Ezekutivu Fundasaun Cristal iha Salaun Enkontru Cristal – Balide, foin lalais.
Presidente Ezekutivu mós husu ba sarani sira katak, bainhira hasoru illas sira iha dalan/estrada, keta haluha karik netik ai – funan, hodi hatudu sinal domin ba Maromak liuhusi illas sira ne’e.
Intervensaun husi Magnifiku Reitor Instituto Superior Cristal, Sebastião Pereira, hato’o mensazen ba estudante hotu ne’ebé partense ba Munisipíu ida – idak(munisipíu 14), inklui alumni sira katak, tenke akompãna, hamutuk hodi halo adorasaun, reza, bainhira illas sira ne’e, vizita ba ida – idak nia munisipíu.
Maske nune’e, amu kapelaun Cristal Manuel Pinto SDB, haree ba peregrinasaun husi illas ne’e ba Munisipíu hotu rekonese katak, iha fulan Rosario, no atividade peregrinasaun ne’ebé hala’o husi Instituisaun Edukativa Cristal, nu’udar selebrasaun ba Mistériu Maromak nian. Alen ne’e, hanesan koneksaun ho igreja lokal sira. Tanba ne’e, partisipasaun sarani hotu nian,iha atividade reza, adorasaun nune’e ida – idak bele hato’o intensaun sira.***(TTM)
Discussion about this post