João Ximenes, representa komunidade aldeia Metin I, suku Bebonuk, postu administrativu Dom Aleixo, Munisípiu Dili, agradese ba Equipa Covid – 19, tanba bele lori sidadaun hirak ne’ebé mak kontaktu ona ho pasiente positivu Covid – 19, ba kuarentena hodi foti amostra.
“Ha’u agradese tebes ba equipa prevensaun Covid 19, Munisípiu Dili, bele tama iha ami nia suku, la’o to’o ba aldeia, hodi lori maluk sira ne’ebé mak deskonfia ou kontaktu besik tebes ho pasiente sira positivu Covid – 19,” kestaun ne’e, João hato’o ba Jornalista Time, iha nia residensia, Metin I, sabádu(27/3).
Sidadaun ne’e esplika tan katak, equipa ne’ebé tun direta to’o ba bairo ka aldeia sira, hetan uluk ona informasaun husi ema ne’ebé positivu sira, durante hela iha sala izolamentu.
“Ita tenke hatene katak, maneira ne’ebé equipa jestaun Covid – 19 uza, di’ak tebes hodi hakotu lalais korente Covid nian iha kapital Dili, inklui munisípiu sira,’’ nia esplika.
Antes hakotu João hato’o, hahalok prevensaun di’ak liu, duke ita kura. Klaru iha lakohi hela iha kuarentena, maibé se da’et fali ba ema seluk oinsa.
“Ba ita nia problema mak ne’e, halo prevensaun ita dehan ne’e ladi’ak. Iha mídia sosial mosu kritika oin – oin. Se ema mate rame – rame, hanesan akontese iha rai seluk, se mak hatan. Ita bele mate hotu, tanba populasaun labarak, kuaze millaun ida resin.” Nia hato’o hodi hakotu.
Entretantu funu hasoru Covid – 19, iha Timor – Leste, hetan apoiu oin – oin, husi Nasaun lubuk ida mak hanesan Australia, Nova Zelandia, Japaun, Organizasaun Mundial Saúde(OMS), no Seluk tan.
Esperansa ida husi Timoroan sira katak, dalan hado’ok ema hotu husi pandemia Mundial ne’e, Governu oras ne’e, prepara ona kondisaun balu, hodi hakat ba realizasaun vacina Astrazeneca. Maibé sei kontinúa hein rekomendasaun balu, tuir parte relevantes. ***(Time)
Discussion about this post