Laiha Base Legal ba Governu Bele Apoia Media Privada

Sekretáriu Estadu Komunikasaun Sosial Mericio Juvinal, dos Reis “Akara”, hateten, Governu labele ajuda Media privada sira iha Timor – Leste, tanba laiha lei ruma/base legal,  konaba transferensia Públika, hanesan durante ne’e, Governu apoiu ba Media Estadu nian, liu -liu RTTL – EP, Tatoli, no seluk tan.  

Kestaun ne’e, Miricio – Akara hato’o liuhosi debate ida ho Conselho de Imprensa , iha salaun  Delta Nova loron 2 fulan Desembru 2021, bainhira partisipa iha Dili Dialogue Forum,iha loron dahuluk kinta(2/12)  ho tema  “Midia Convensional iha era Digitalizasaun”, ne’ebé  organiza husi Conselho Impresa Timor – Leste, hanesan programa annual ninian, ba tinan ida ne’e, Dr. Jose M. Ramos Horta, mak halo abertura.    

Governante  ne’e dehan tan, foin lalais Oitavu Governu konstitusional, liuhosi parte orgaun komunikasaun social, tenta hela hamosu lei ida, hodi haree ba  posibilidade sira, hodi apoiu Media privada hotu ne’ebé eziste, maibé lei ne’ e rasik, hetan veta husi Xefe Estadu atúal.   

Relasiona ho asuntu veta, Ministru Asuntu Parlamentar no Comunikasaun Social, Francisco M. da Costa P. Jeronimo hateten, sua Selensia Presidente da Repúblika, veta duni lei apoiu ba media privadu ho razaun ida katak, kuandu Governu apoiu ona Media privada sira, impaktu ida laiha ona imparsialidade,  la independente  no sei lahalo kontrola social ida ne’ebé di’ak.

“Sim lei ne’e, veta duni tanba Presidente Tauk media privada sira bele lakon sentidu sira bazeia ba knar hanesan orgaun komunikasaun ninian/kontrolo social. Maibé ita sei haree fila – fali kestaun ne’e. Karik lei ne’e avansa Konselu Imprensa mak sei monitoriza no kontrola konaba media sira nia servisu, relasiona ho Liverdade Imprensa ho Liverdade espresaun”, hato’o husi Ministru iha Delta – Nova, Dili okaziaun ensera Dili Dialogue Forum sesta, 3/12.

Media  Nasional nia hanoin konaba “Midia Convensional iha era Digitalizasaun”

Dirijente  GMN TV, Jorge M. de Araújo Serano, iha Dili Dialogue Forum 2021,  hateten, dezde 2003, diariu hahú ho jornal semanal lian Portuges ho plataforma Konvensional, maibe hafoin liu tinan balu kontinua mai ho Televizaun no Radio, tuir plataforma dijitais ninian bazeia ba nia lisensa negosiu nian.

Nia esplika katak, merkadu Timor nian maske ki’ik, mezmu ohin loron ema hotu uza ona telemovel, maibé leitores sira kontinua uza media konvensional, tanba ne’e, jornal diariu kontinua eziste.

 “Media atu moris ou la’e, la’os dijitais ka kestaun Konvensional depende ba Jestor. Fa’an Jornal la’ós mos, Garantia atu sustenta atividade, sa tan oras ne’e, ema hotu iha telemovel iha liman,”  esplika husi Jorge Serano.  

Nu’udar emprezáriu, Nain mós ba GMN TV dehan,  ba se de’it  hala’o negosiu ki’ik e bot tenke iha segredu rasik, hodi bele to’o ba susesu “o Segredo é a alma do negocío”

Nia aumenta, nu’udar ema emprezariu tenke hatene analiza merkadu, inklui adapta aan mós, ho mudansa sira ne’ebé iha, espesialmente ligasaun ho evolusaun dijitais agora, tanba iha tinan lima mai tan, Mundu dijitais   sai ameasa ba Media Konvensional sira, ida ne’e mós, depende fali ba “Marka/kualidade”.  

Entretantu Diretor Timor Post, Suzana Cardoso, dehan biar oras ne’e, mosu  media foun sira iha Timor – Leste, ho plataforma dijitais, maibé Timor Post hanesa media konvensional ida ne’ebe kada loron kontinua produs jornal hodi fahe ba leitores sira iha instituisaun publiku no privadu sira, hanesan bai – bain.

Dirijente ne’e refleta ba era dijitalizasaun dehan, Jornal diariu Timor post mós, iha website rasik, nu’udar preparasaun ida hodi kompete iha futuru.

Alende ne’e, hanesan nain ba Timor Post dehan, media privada ida atu moris, públisidade nu’udar forsa prinsipal. “Dala  ruma publisidade dumina iha pagina sira hotu, notisias menus, ikus mai hetan kritika husi parte balu tanba la fo espasu ba informasaun”. Esplika husi diretor. 

Sujestaun ida  husi Suzana Cardoso, husu Governu hanesan esperansa, – Se bele Governu halo programa  ka promosaun ruma, servisu ho Media sira, hodi  tau iha Jornal, ikus mai Media privada halo publikasaun, Governu sosa fali, hodi fahe ba eskola sira, komunidade, no autoridade sukus, tanba ida ne’e hanesan maneira simples,  bele tulun media Konvensional sira, iha Timor – Leste, ikus mai bele kontinua habelar informasaun liuhosi meius konvensional nian.

“Ba ita agora media Konvensial sei bele funsiona maibé ba futuru karik rede internet lais ona Timor – Leste sei tama ba Mundu dijitais ne’ebé avansadu”.

Entretantu tuir informasaun ne’ebé Time Timor asesu iha eventu Dili Dialogue Forum ne’e, iha loron dahuluk(2/12), parte fotu fó ideas mesak furak konaba “Midia Convensional iha era Digitalizasaun”.

Maibé parte Intervensaun ba orador sira nia hanoin komentariu ida husi Dirijente CEPAD, João Boavida, no Orgaun komunikasaun UNTL Marcelino Magno,  husu media nasional(Privadu no Naun privadu),  hahú agora atu halo públikasaun barak liu konaba oinsa bele hakbi’it ekonomia rai laran, duke tau preoridade ba kestaun politika, tanba durante ne’e, Media dijitais sira fo atensaun maka’as tebes, kestaun politika, mai ho konteudu ida ne’ebe iha sentidu, hasa’e, buka soran lider nasional sira, ida ne’e bele  fahe sociedade ida ne’ebe foin sai husi konflitu bot.

Dirijente Conselho de Imprensa, Media na’in balu dehan, maske ema Timor  menus numeru leitores, maibé kuaze maioria ema hotu gosta akompana notisias politika iha plataforma Konvensional nian hanesan Televisaun, Radio, no Jornais.

Loron segundu Conselho de Imprensa atribui Karteira Profesional

 Iha loron 3 fulan Desembru 2021, antes Ministru Ministru Asuntu Parlamentar no Comunikasaun Social, Francisco M. da Costa P. Jeronimo, ofisialmente ensera Dili Dialogue Forum 2021, Conselho de Imprensa Timor – Leste, atribui mós karteira professional ba  jornalista Media Privadu no Media Estadu nian iha Timor – Leste ba periodu 2021.

Media sira ne’ebé nia jornalista sira hetan karteira professional mak hanesa tuir mai ne’e:

1. Jornal Independente  ema nain rua(2)
2. Timor News ema nain ida(1)
3. RTT – Ep ema nain ida(1)
4. Ajensia Tatoli ema nain ida (1)
5. Hatutan Com ema nain ida (1)
6. GMN TV ema nain tolu(3)
7. Naunil Media ema nain rua (2)
8. Timor Post nain ida (1)

Entretantu Conselho de Imprensa mós halo verifikasaun no simu dokumentu husi media hat, hodi rekonese sira nia ezistensia(husi Conselho de Imprensa) ho obetivu hetan legalidade bele hala’o knar nu’udar  orgaun komunikasaun social. Media ne’ebé sai legal no rejistadu ona  iha tinan 2021 mak tuir mai:

1. Radio Comunidade Mauloko Maubisse
2. Hatutan Com.
3. Radio Comunidade Lian Matebean
4. Radio Rakambian

Husi rekonesimentu ne’e, Presidente Conselho de Imprensa,  Virgilio da Silva Guterres, husu ba orgaun komunikasaun sira ne’ebé rejistadu ona tenke hala’o funsaun ho di’ak no kontinua ba oin, labele para iha dala klaran.

“Hahú oin ba oin, imi sai ona legal, maibé karik lahalo funsaun ho di’ak(permanente), Conselho de Imprensa Timor – Leste, iha direitu ida, sei deklara ba públika abertamente katak, media A, ka Media B, laiha ona. Karik hetan jornalista ruma husi media sira ne’e, iha imi let, rejeita sira nia prezensa”. Lian Presidente  Conselho de Imprensa hodi hakotu.. ****(TTM)