Presidente Autoridade Munisípiu Baukau, Olivio Freitas, dehan implementasaun Politika sesta básika iha Munisípiu Baukau, seidauk finaliza.
“Konaba implemetasaun Politika Sesta Básika hodi distribui sasan básikas ba populasaun iha Baukau, seidauk finaliza, tanba iha suku lubuk ida to’o aldeia sira, nia benefisiariu, seidauk simu no hetan sasan ne’ebé mak kompania sira distribui.” Hato’o husi PAM ba jornalista sira, bainhira partisipa iha asina kontratu Fundu GGP, hodi rehabilitasaun Uma Kakuluk Eskola Teknika Dom Bosco Fatumaca, no Konstrusaun Eskola EB Fatulaun – Orlalan, iha embaixada Japaun, tersa(23/02).
Presidente autoridade ne’e mós hato’o tan, kada semana, sempre hato’o relatorio Sesta Básika nian ba iha Nasional.
“Konaba tempu bainhira mak implementasaun sesta basika hotu, ha’u laiha informasaun, maibé kada semana, sempre iha relatório hato’o ba nasional.” Olivio hato’o kestaun ne’e, hodi responde ba pergunta ida, Time Timor nian, bainhira mak politika sesta básika remata iha Munisípiu Baukau.
Entretantu fonte konfirmadu balu husi munisípiu Baukau, ne’ebe lakohi temi sai nia identidade hato’o katak, iha Baukau Vila – Nova, sasan ne’ebé tau iha armazen balu, komesa aat dadaun ona, maske seidauk fahe ba benefisiariu sira.
“Iha armazen ida iha Vila – Nova ne’eba, mina ne’ebe tau iha laran komesa aat, tanba suli hanesan be’e, nakonu iha armazen laran. Sasan sira seluk mós estragas.” Hato’o nia hodi hakotu. ****(Time)
Discussion about this post