Razaun Envolvimentu Lider 74- 75 iha Eleisaun Presidensial Periodu 2022 – 2027

Eleisaun Presidensial 2022 – 2027, lider Rejistensia 74  – 75, mós kontinua hola biban hodi kompete iha eleisaun ne’ebé mak sei hala’o iha loron 19 fulan Marsu 2022.

Husi Lider sira ne’e hotu, ida – idak fó nia komentariu hodi hato’o razaun hodi dehan, “Ami Hakarak kompete iha eleisaun Presidensial 2022 – 2027, hanesan momentu ikus ba jerasaun 74 – 75, karik eleitu mak sei  hametin di’ak liu tan konstrusaun Estadu, Restaura Konstituisaun RDTL, antes iha futuru, Nasaun ne’e, sei lidera husi Jerasaun foun sira”.  

Bazeia ba Lista ne’ebé iha, lider rejistensia 74 ne’ebé tama iha lista hodi kompete mak hanesan, José M. Ramos Horta, Rogerio Tiago Lobato, inklui Presidente “Lu – Olo” no mós Jeneral Reformadu “Lere Anan Timur”, nu’udar lider Rejistensia 75, ne’ebé, ho aten brani defende Timor – Leste, husi okupasaun estranjeira ninian, durante tinan 24(1975- 1999).

Rogerio Lobato iha fulan Febereiru dehan, transformasaun Jerasional kona ba ukun iha Timor – Leste, hahú ona, maibé sei kontinua supervisiona husi Lider Rejistensia sira mak hanesan Maun bot Kay Raxa Xanana Gusmão, José M Ramos Horta, no sira seluk tan.

Entretantu husi parte Jeneral Reformadu “Lere Anan Timur” nia parte dehan, loloos sei  kontinúa hala’o nafatin knar iha vida militar, hodi  lidera Institiusaun F – FDTL, maibé hakarak kompete iha eleisaun Presidensial ba periodu 2022 – 2027, tanba kestaun idade no kestaun moral.

“Iha hanoin balu husu ba ha’u, atu prepara aan ba 2027, mak bele ba kompete iha eleisaun Presidensial tuir mai. Ha’u la aseita tanba idade, no hakarak duni kompete iha periodu ida ne’e”, lian Lere Anan Timur bainhira entrevista ho GMN – TV, liuhosi Programa “Grande Entrevista”kinta (17/02).

Maske nune’e, espetativa husi públiku dehan, Timor – Leste hanesan Nasaun Demokratika, sidadaun se de’it, bele kandidata aan, maibé povu no desizaun popular, liuhosi eleisaun mak determina. 

Idea seluk mós dehan, ita Timoroan sira hotu, labele hakfodak ho númeru kandidatu hamutuk 16. Sira mesak Timoroan, sira nia kandidatura hanesan opsaun ba povu, hodi hili se mak di’ak liu, tuir ida – idak nia konsensia no espetativa.

“Ba ita keta haree númeru. Maibé haree se mak merese duni, hodi ba tu’ur iha kandeira Presidente iha periodu mai. Knar sidadaun nia mak votu ida, ho segredu, demokratiku, livre, no responsabilidade”. Opiniaun públika. **** (TTM)