Laureadu Novel da Paz, José Ramos Horta, hateten aumenta númeru Covid – 19 iha Timor, husi loron ba loron, la’ós asuntu ne’ebé grupu ka organizasaun ida mak hakarak politiza, maibé ne’e realidade.
“Ha’u nia haree Covid – 19 ne’e, eziste duni, la’os asuntu politizadu. Ba ita Timor, tinan 2020, kazu ladun iha, agora tama ona tinan 2021, númeru sa’e bebeik. Nia diferesa mak tratamentu sintomatiku de’it signifika ladun grave no laiha mate,” lian eis Presidente RDTL iha okaziaun Grande Entrevista ho GMN TV, kinta (25/3), hodi responde ba opiniaun publika nian dehan numeru Covid – 19, aumenta iha Timor tanba grupu balu mak politizadu.
Esplikasaun seluk rekoñese, invazaun Covid – 19 iha Timor – Leste, mai husi liña fronteira parte NTT – Indonese, loloos ne’e, Governu tenke intensifika no halo vizilansia ida di’ak liu, inklui aplika sansaun ruma ba hirak ne’ebé mak viola regra ho sansaun ne’ebé forte, durante tempu emerjensia.
“Iha Mundu tomak, la’ós de’it Timor, problema ida mak la konsege kontrola didi’ak liña fronteira sira. Ita iha kuarentena iha parte entrada ninian, tanba seidauk kontrola ho didi’ak, invazaun Covid – 19, tama mai rai laran,” nia hato’o.
Hatan pergunta ida husi GMN – TV konaba impaktu Covid – 19, liga ba asuntu ekonomia rai laran lider diplamátiku ne’e responde, ha’u la’os ema ekonomista ida maibé loloos ne’e, programa ida bolu sesta básika loja nain ka kompañia sira, labele aproveita situasaun hodi hetan lukru no inventa sasan nia folin.
“Prontu programa hanesan sesta básika bele iha aproveitamentu ba lukru, maibé Governu mak tenke iha inisiativa ida, hodi tu’ur hamutuk ho kompania inklui loja na’in, hodi dehan situasan difisil governu bele ajuda imi, mas presu tenke tuir estandar normal.” Nia esplika.
Antes termina José Ramos Horta hato’o, iha tempu ida difisil ne’e, dalan ida atu rekupera ekonomia rai laran, kompania ka grupu ne’ebé halo emprestimu ba Banku sira, tenke ho fuman ne’ebé menus, maibé iha timor ida ne’e la akontese.
“BNCTL de’it mak funan tun, Banku sira seluk laiha mudansa. Tenke hanoin katak Banku mak sai asset importante ba roda ekonomia Nasaun ida nian.”
Progresu ida ba Oitavu Governu, konsege duni realiza implementasaun Sesta Básika ho di’ak, tanba komunidade sira husi Munisípiu hotu bele asesu ba sasan ne’ebé governu fahe, liuhosi kompañia lubuk ida.
Enkuantu benefisiu ida ba agrikultor ligadu ho programa Sesta Basika, iha kompañia no grupu kooperativa sira ne’ebe Governu fo fiar, tun direta ba iha base, hodi sosa komunidade nia produtu lokal sira, mak hanesan hare, batar no seluk tan.****(Time Timor)
Discussion about this post