Presidente CNE, Jose Antonio da Costa Belo, hatete ho problema Covid – 19, Comisaun Nacional Eleisaun(CNE), , sei husu ba parte saude, hodi hola parte mos, iha realizasaun eleisaun rua, Presidensial 2022, no Parlamentar 2023, hodi haree ba prevensaun Covid, iha sentru votasaun bazeia ba rekomendasaun husi Organizasaun Mundial Saude .
“Uluk iha eleisaun sira liuba, laiha envolvimentu parte Saúde. Maibé ho pamdemia ne’e, ita sei haree hodi servisu hamutuk ho parte Saude, oinsa mak envolve aan, iha sentru votasaun sira, nune’e tau regra prevensaun nian, tuir rekomedasaun ba prevensaun Covid – 19,” nia hato’o asuntu ne’e, iha okaziaun ida, bainhira dada lia ho media Nasional(GMN), segunda (6/9).
Husi parte seluk afirma mós katak, CNE hamutuk ho ESTAE, sei haree posibilidade no kontinua hala’o edukasaun votante no edukasaun cívika liu -liu iha base, nune’e, tempu eleisaun mai, sidadaun ida – idak, bele hola parte iha festa demokrasi rua ne’ebé mak iha, hodi determina futuru Nasaun.
“Ho situasaun politika no problema sira hanesan agora, atu determina futuru Nasaun, ita hotu só bele ba iha kabina votu nia oin mak deside. Biar politika sira hato’o buat oin – oin, maibé tinan lima liuhosi festa demokrasia ne’e, kada votu sei desidi,” nia rekoñese.
Antes termina, Jose hato’o klarifikasaun balu katak, Timor – Leste, konsulta ona ho Nasaun CPLP, haree liuba mekanizmu hala’o eleisaun iha tempu pesti Corona, tanba sira realiza ona eleisaun lubuk ida. Ho nune’e, informasaun hotu sai referensia ba Timor – Leste, ba hasoru festa demokrasia rua iha tinan 2022 – 2023.
Ikus liu Presidente CNE hato’o informasaun ida katak, to’o oras ne’e, CNE seidauk rejista kandidatu ofisial ruma, hodi kompete ba eleisaun Presidensia tuir mai, tanba Presidente da Repúblika, seidauk dekreta loron ba eleisaun presidensial nian. ****(Time)
Discussion about this post