IEC Selebra Misa Asaun Grasa Envolve Estudante Wain ba Wain

Cristal –  Hodi fó Gloria ba festa Maria do Rosario de Fatima, Maria Auxiliadora sarani sira nia tulun hanesan mós, padrueira ba Instituisaun Edukativa Crista(IEC- FC), amu kapelaun Cristal Manuel Pinto, SDB, hamutuk ho fundadores, estudante, profesor, dosente Cristal,  selebra misa asaun grasa envolve estudante wain ba wain.

Misa ne’e, ho objetivu prinsipal kontinúa  husu tulun ba Mahein eskola nian(Kristu Nai Liurai, Don Bosco Inan Maria Auxiliadora, São João Paulo segundu)atu nafatin akompana atividade hotu ho di’ak, liu – liu iha aula prezensial ne’ebé Cristal reativa ona iha loron 27 fulan Setembru 2021.

Amu  selebrante  Manuel Pinto SDB, hanesan amu kapelaun ba Cristal haree katak, durante tinan 2, labele hala’o   misa aberta hodi envolve estudante barak tanba  Covid – 19.

“Misa ida ohin  envolve estudante sira iha salaun ida ne’e, sai to’o iha liur ne’eba,  tanba hetan grasa ispiritu Santu nian, liu –liu mahein sira husi eskola Cristal”, amu kapelaun dehan  iha Salaun Cristal, bainhira selebra misa asaun grasa iha loron kuarta(13/09).

Maske nune’e, amu kapelaun husu ba parte hotu, liu –liu estudante Cristal, nafatin uza maskara, fase liman no hatene hodi pratika distansia sosial tanba Covid, iha ona Timor – Leste.

Hanesan sidadaun Manuel Pinto dehan, obrigasaun ba sidadaun hotu, hahú husi edukador, estudante tenke vacina tanba atu bele fó salvasaun ba ema seluk.

“Vacina mós mate, la vacina mós mate. Di’ak liu vacina tiha de’it tanba ida ne’e, fó mós salvasaun ba ema seluk iha uma, eskola, fatin servisu no mós fatin importante sira”. Dehan amu kapelaun hodi termina.

Enkuantu hafoin  misa Presidente Ezekutivu Fundasaun Cristal Agostinho dos  Santos Gonçalves, fó informasaun ida katak, relasiona ho atvidade aula prezensial,  nia rasik sei halo inspesaun ba edukador ka estudante hotu iha sala laran, hodi identifika  kartaun kinur.  Karik  laiha di’ak liu hela lai iha uma tanba razaun saude públika.

“Ha’u rasik tama sai aula hodi haree se mak iha kartaun kinur ou la’e. Se laiha di’ak liu hela uma, nune’e vacina tiha mak bele kontinua servisu ou mai eskola”, lian Presidente ezekutivu.

Antes hakotu afirma katak, karik Governu realiza planu hodi vacina estudante sira ho idade tinan 12 to’o tinan 17, ida ne’e eskola no inan – aman tenke koopera.

Observasaun Time Timor iha misa asaun grasa ne’e, estudante, profesor, dosente  hotu – hotu uza maskara hodi hado’ok aan husi Covid – 19, no variante Delta iha Timor – Leste.*****(Time)