Vizita IEC: Horta Preokupa ho Dezenvolvimentu Setor Agrikultura iha Rai Laran

Iha loron 21 fulan Outubru 2021, Loureadu Novel da Paz, Dr. Jose Ramos Horta, hala’o vizita ba dala uluk iha Institusaun Edukativa Cristal(IEC).

Objetivu husi vizita ne’e, sai orador prinsipal iha semináriu loron ida ho tema “Importansia hosi Politika Edukasaun Saúde iha Sentidu Atual hosi Pandemia no Izolamentu Sosial”.  

Tanba ne’e, ligasaun ho tema iha leten antes esplika konaba politika Edukasaun – Saúde,  eis Presidente periodu 2007 – 2012 ne’e, preokupa tebes ho dezenvolvimentu setor agrikultura iha rai laran tanba dezde Timor – Leste restaura nia ukun aan, besik tinan rua nolu ona, kontinúa depende ai – han sira hanesan fo’os, ba  Nasaun seluk, ho kuantia bot.

“Antes ko’alia konaba Importansia hosi Politika Edukasaun – Saúde, keta haluha setor agikultura. Ida ne’e, sai base ba Edukasaun no saúde. Han bosu, ba eskola labaruk, konserteza saúde mós di’ak. Tanba ne’e, setor agrikultura Governu tenke tau preoridade maka’as. Tau preoridade tanba ita kontinua depende ai – han (fós), kontinua tama husi Nasaun Vietnam no seluk tan”,hato’o husi Ramos Horta iha Salaun enkontru Cristal – Balide, Dili kinta(21/10).

Tanba ne’e, nia dehan se karik sei iha oportunidade hodi sai Primeiru Ministru, sei buka Fundu hodi kria banku ida hodi tau osan ba Joven sira, liu –liu fasilita estudante oan sira, halo kreditu para estudante sira uza ba  han, hodi iha saude di’ak, edukasaun  Nasaun mós forte.

“Karik ha’u hetan oportunidade sai primeiru Ministru, kompremisiu ida mak kria fundu ba Joven. Han bosu ba eskola lasente dukur/baruk. Tanba ha’u hatene iha labarik balu kada loron sai husi uma lori de’it centavus lima nolu, hodi sosan hahan balun laiha. Governu tenke preokupa ba ida ne’e”, nia eplika.

Antes termina diplomata senior ne’e, hato’o agradese ba Institusaun Edukativa Cristal, tanba bele konvida nia, ba da uluk vizita instituisaun Edukativa ne’e.

“Ha’u haleu fó palestra sira iha Mundu, durante ne’e, palestra bar- barak iha Universidade sira seluk, ohin bele mai iha Cristal”. Nia hato’o hodi hakotu.

Relasiona ho prezensa husi Eis Titular ne’e iha Cristal, Reitor Instituto Superior Cristal, Sebastião Pereira, Presidente Ezekutivu Fundasaun nian, Agostinho dos Santos Gonçalves, agradese no rekonese katak, durante 24 anos, to’o mai  restaurasaun RDTL nian, besik tinan 20, ikus mai, lider nasional ne’e, konsege vizita ba iha Cristal.

“Ami agradese ba vizita husi sua^cia nian, tanba vizita ida ne’e, foin mak realiza ba dala uluk no especial tebes. Maibé ami mos kontinúa simu lider Nasional sira seluk, iha hanoin di’ak hodi ko’alia konaba edukasaun no dezenvolvimentu Nasaun nian iha setor hotu – hotu”. Hato’o husi Agostinho dos Santos Gonçalves.

Observasaun husi Media ne’e, durante vizita husi eis Presidente ne’e, hetan partipasaun masima, no marka mós prezensa husi kada Universidade ka Instituisaun Superior sira iha Timor – Leste, hanesan IOB, DIT, no seluk tan. ***** (TTM)