Estudante Foun: FSS – ISC Hala’o Orientasaun Tinan Akademiku 2023  

Iha Loron 24 fulan Febereiru tinan 2023, estudante foun Fakuldade Siensia Saúde(FSS), husi Instituto Superior Cristal(ISC), kuaze rihun ida – atus hat – ualu(1408), hala’o orientasaun tinan akademiku 2023, iha kampus ISC – Balide, Dili.  

Presidente komisaun organizadora simu Estudante foun husi Fakuldade Sensia Saúde – ISC, Bernadete de Jesus, relata katak, estudante foun sira ne’e, kompostu husi departamentu rua, Departamentu Enfermagen ho estudante kuaze atus neen – ualu nulu  resin neen(686), husi  departamentu Partera, atus hat – ualu nulu resin resin tolu (483).

Nia subliña, bazeia ba despaixu husi Reitor ISC, Dr. Sebastião Pereira MM, mak komisaun simu estudante foun, hahú hala’o rejista ba estudante foun, komesa husi fulan Novembru tinan 2022.

“Ita konsege hala’o orientasaun tinan akademiku foun ida ne’e, tanba bazeia ba despaixu husi Reitor ISC, nune’e equipa simu estudante foun hahú hala’o rejista komesa iha fulan Novembru tinan 2022,” informasaun ne’e hato’o,husi Bernadete de Jesus, liuhosi le’e relatoriu badak iha Salaun Futsal- Cristal, Balide – Dili, sesta(24/02).

Fatin hanesan Vice Reitor ISC, Jacinto de Oliveira Junior, dehan ba tinan ne’e, total estudante foun hotu ne’ebé rejista iha kampus Cristal sentral, inklui klase polo ninian ba Fakuldade Siensia Saúde de’it, númeru  estudante foun, kuaze rihun rua – atus lima(2500).

“Sim, estudante sira ne’ebé tuir orientasaun ne’e, seidauk konta ho ISC – polo ninian tanba ne’e, total estudante ba tinan akademiku 2023, ba de’it  Fakuldade Siensia Saúde, kuaze rihun rua – atus lima resin”. Lian Vice Reitor ba media nasional liuhusi entrevista badak, hafoin abertura ba orientasaun ne’ebé loke diretamente husi Presidente Ezekutivu Fundasaun Cristal Dr. Agostinho dos Santos Gonçalves MM.   

Importansia orientasaun ba estudante foun

Presidente Ezekutivu Fundasaun Cristal, Dr. Agostinho dos Santos Gonçalves, MM, hato’o lian ba estudante foun ISC, ne’ebé tuir orientasaun refere katak, importansia orientasaun  ne’ebé hala’o ba estudante foun iha kampus,   alende entre estudante, kolega, dosente ho estudante bele koñese malu, parte ida bele hatene mós regra, regulamentu, iha fatin aprende nian, liu –liu iha kampus Cristal.

“Orientasaun ho sentidu atu bele koñese malu. Hanesan estudante universitáriu iha Instituto Superior Cristal, agora ha’u husu ba imi, tenke tau aas valor positivu iha moris. Nu’udar estudante iha ISC, tenke muda sigla ISC, hodi sai  estudante ne’ebé mak Inovativu, Suportivu, no Creativu”. Lian Presidente Ezekutivu FC, husu ba estudante foun tinan akademiku 2023.

Parte importante ida, Reitor Instituto Superior Cristal, Sebastião Pereira, lori ISC, nia naran hato’o bem vindu ba estudante foun Fakuldade Siensia Saúde – ISC tinan akademiku 2023, ho esperansa bele sai parteira no enfermajen ne’ebé di’ak, nune’e iha futuru bele servi’i Nasaun no povu ho di’ak liutan.

Observasaun media ne’e nian, iha orientasaun ne’e, fase dahuluk hala’o mós meditasaun hamutuk, hodi husu grasa, no bensaun ba Nai Maromak, nune’e bele akompaña atividade ensinu nian ho di’ak.

Parte importante ida seluk, komandante polisia Tranzitu Dili, Domingos Sarmento Gama, halo mós sosializasaun ba estudante sira konaba “Lei kodigu Estrada” no sosializasaun “Lei Arma Branca”, hanesan prevensaun ba konflitu iha Timor – Leste.***(TTM)