Lere Anan Timur – Fretilin Manan Sei Lori Naroman ba Povu

Tasi – tolu- Dom Aleixo, Dili, 16 Maiu 2023: Lideransa TROIKA no segundu jerasaun partidu FRETILIN Lere Anan Timur, hateten se povu Timor – Leste, fo konfiansa dala ita tan hodi Fretilin ukun iha Governu periodu ida ne’e, maka sei lori Naroman ba povu tomak tanba kompremisiu Fretilin nian rua de’it, liverta Pátria no liverta Povu.

Kampana Fretilin, Tasi – tolu, 16/05/23

“Fretilin mak hahoris lider rejistensia sira. Uluk Fretilin mosu hakarak liverta Pátria. Agora Fretilin hakarak liverta povu, ida ne’e iha nanis ona dezde 1975. Se Fretilin ba ukun iha dever moral hodi haree povu nia moris di’ak,” hato’o husi Lere Anan Timur bainhira realiza kampana  fase ikus iha Tasi – tolu Dili, tersa(16/05).

Lere Anan Timur mós dehan, FRETILIN tenke sai nafatin modelu no marka diferensa. Tanba ne’e nia husu ba jerasaun patriota iha era ukun aan ida ne’e, labele diskrimina no evita hodi hasai liafuan otonomista ba maluk Timoroan sira seluk tanba ita mesak Timoroan de’it.

“Fretilin hanesan uma lisan Timor nian, nia lia nain sira mak Maun Mari, Maun Xanana, Maun Ramos Horta, no seluk tan. Tanba ne’e, jerasaun foun patriota no povu hotu – hotu, labele diskrimina malu. Hapara lia fuan otonomista, maibé simu malu, bolu sira mai hakuak sira. Fretilin tenke marka diferensa,” hato’o husi Lere.

Enkuantu iha kampana ne’ebé realiza iha  Tasi- tolu, Presidente partidu Fretilin nu’udar mós eis Presidente RDTL, Francisco Guterres “Lu – Olo, hamutuk ho Sekretáriu jeral Fretilin, Mari B. Alkatiri hateten bainhira Fretilin ukun, alen lori Naroman ba povu no Nasaun, sei fó preoridade  liu tan ba setor hotu – hotu hodi asilera prosesu dezenvolvimentu Nasaun no povu nian.

“Edukasaun importante ba Timoroan hotu. Bainhira joven sira sai matenek , di’ak ba futuru Nasaun doben. Tanba ne’e, Fretilin sei aumenta osan ba setor edukasaun no saude ninian hodi servi’i povu ba moris di’ak. Tanba ne’e hamutuk no ita vota ba Fretilin, iha númeru 11, nune’e, sai Vitoria dala ida tan ba povu tomak,” hato’o husi Lu – Olo.

Lokasaun Tasi – tolu, 16/05

Fretilin mós promete bainhira ba ukun mak sei respeita lei sira iha TL, hodi hametin Estadu no hala’o investimentu ida integradu iha area  hotu – hotu.

Observasaun media ne’e, kampana iha Tasi – tolu, hetan siguransa husi PNTL, no hetan supervizaun husi parte CNE, ESTAE hamutuk ho observador Nasional no internasional sira.****(TTM)