Iha loron fersa (23/02/2021) , embaixada Japaun iha Timor – Leste, hala’o serimónia asina kontratu hodi apoiu Fundu ba projetu rehabilitasaun Uma – Kakuluk Eskola Teknika Don Bosco Fatumaca – no Projetu Konstrusaun Eskola Ensinu Básiku filial Fatulaun- suku Orlalan, postu Laclubar, Munisípiu Manatuto.
Relasiona ho Fundu Asistensia ba Seguransa Umana(GGP), hodi suporta projetu sira refere, Ministru Edukasaun Joventude no Desportu, Armindo Maia, hato’o agradese ba Governu Japones, liuhosi nia embaixada iha Dili.
“Durante ne’e, apoiu Governu Japaun maka’as tebes iha area infaestrutura nian, saúde no mós edukasaun. Tanba ne’e, lori Ministériu Edukasaun Joventude no Desportu nia naran, hato’o agradese ba Governu Japaun nia asistensia sira, liu –liu ba projetu rehabilitasaun eskola teknika Fatumaca – Gariwai, no projetu konstrusaun eskola Ensinu Básiku filial Fatulaun – Orlalan,” diskursu Ministru Edukasaun Joventude no Desportu, antes asina Fundu Asistensia ba Siguransa Umana(GGP), iha embaixada Japaun (23/2).
Maske nune’e, rekoñese mós katak, eskola lubuk ida iha teritóriu laran, kontinua laiha sintina no be’e mo’os, inklui falta tebes infaestrutura escolar, hodi fasilita estudante sira, hala’o prosesu aprendizajen normal.
“Ita nia eskola sira balu laiha casa de banho, bé laiha, maibé Ministériu Edukasaun liohosi Oitavu Governu,neneik buka solusaun, hodi resolve no konta mós, ho apoiu parseiru sira nian.” Hato’o nia hodi hakotu.
Iha fatin hanesan emabaixador Japaun ba Timor – Leste, Kinefuchi Masami, liuhosi nia deskursu hakerek iha karta ida katak, asina kontratu ba projetu rua ne’e realiza, hodi responde ba pedidu ne’ebé mai husi Ministériu Edukasaun Joventude No Desportu.
Deskreve mós katak, montante ba projetu rua ne’e, rehabilitasaun uma kakuluk Eskola teknika Dom Bosco Fatumaca inklui konstrusaun eskola EBF Fatulaun iha Laklubar, Governu Japaun oferese orsamentu US$90.000(rihun sia nulu) dollares Amerikanu ba kada projetu.
Entretantu, komentáriu husi diretor eskola teknika Dom Bosco Fatumaca, Fr. Almilcar da Silva, dehan durasaun ba obra hodi rehabilita uma kakuluk eskola teknika Dom Bosco Fatumaca, ho durasaun tinan ida.
Enkuantu, husi parte Fundasaun Leobalu ne’ebé reponsabiliza ba projetu konstrusaun eskola Ensinu Básiku filial Fatulaun- suku Orlalan, postu Laclubar promote ona, implementasaun no ezekusaun ba obra, sei termina ho durasaun fulan ualu. Maibé, iha mos esperansa ida katak, “Se lais liu ida ne’e, di’ak liu tan.”
Observasaun Time Timor nian iha serimónia asinatura ne’e, marka mós prezensa husi Ministru Komersiu no Industria, Jose Lucas do Carmo da Silva, inklui Presidente Autoridade Munisípiu Baukau, Olivio Freitas hamutuk ho Administrador Munisípiu Manatuto, Fernando D omingos Sousa Junior, no bainaka espesial seluk.***(Time)
Discussion about this post