Nafatin hanoin hikas fali prezensa maktoban sua santidade João Paulo Segundo iha Timor – Leste, iha tinan 33 liu ba kotuk (12/10/1989 – 12/10/2022), Instituisaun Edukativa Cristal, liuhosi amu kapelaun Cristal Pe. Manuel Pinto SBD, hamutuk ho fundadores Fundasaun Cristal, dosente, edukador no alunu sira husi nivel hotu, hahú husi ensinu básiku to’o ensinu superior Cristal, realiza misa asaun grasa nu’udar sinal agradesimentu ba Maromak.
Jacinto Oliveira Junior hanesan Prezidente Klibur Alumni Cristal dehan, loron 12 fulan Outubru, nu’udar loron prezensa husi maktoban sua santidade João Paulo Segundu iha Timor – Leste. Tanba ne’e misa ne’ebé hala’o iha Instituisaun Edukativa Cristal, didikan ba João Paulo Segundo, no husu grasa ba Kristu Nai Liurai, no padrueira Fundasaun Cristal inan Maria Auxiliadora.
“Misa ida ne’e primeiru komemora loron 12 Outubru, nu’udar loron prezensa João Paulo II iha Timor – Leste. João Paulo II, bainhira vizita Timor – Leste, lori duni esperansa bot ba povu Timor, ikus mai ita bele alkansa mehi ba ukun rasik aan ka hetan liverdade. Intensaun seluk mak nafatin husu grasas ba Mahein sira hanesan Kristu Nai liurai, Inan Maria Auxiliadora, bele akompãna atividade Ensinu iha Instituisaun Educativa Cristal kontinua la’o ho di’ak. ” hato’o husi Jacinto Junior ba jornalista sira liuhosi entrevista hafoin misa iha Cristal – Balide, Dili kuarta(12/10).
Ligasaun ho misa ne’e, amu kapelaun Cristal, Pe Manuel Pinto SBD, liuhosi nia omilia husu ba estudante Cristal nivel hotu, atu moris tuir dalan ne’ebé loos, nune’e, labele la’o sala dalan.
“Moris iha Mundu ne’e, laseluk la leet tenke hasoru dalan rua. Dalan di’ak no hili dalan aat. Dalan di’ak hatudu pasensia, tulun malu perdua malu, no moris iha dame – domin. Dalan seluk(aat) mak moris iha hahalok odiu, vingansa, no laran moras. Prezensa João Segundu iha Tasi – tolu – Dili, iha tinan 33 liu ba kotuk, husu ona ba Timoroan sira, atu nafatin sai Masin rai nian no Maroman mundu nian. Signifika liuhusi Kristu Nai liurai hafoun ema liuhusi sakramentu baptismu, hodi ita bele moris iha ispritu santu nia mahan.” Lian amu kapelaun.
Vizita Illas Padrueiru/a ba IEC- FC Alumi Cristal ho familia no povo tomak Timor – Leste iha Munisipíu 14 iha Teritoriu tomak
Programa ida husi klibur alumni Cristal hamutuk ho Fundador Fundasaun Cristal, estudante sira, iha fulan Outubru nu’udar fulan Rosariu no fulan João Paulo Segundu, no fulan Novembru fulan Kristu Nai Liurai, illas sira ne’ebé tau iha Cristal, hala’o vizita ba Munisipíu 14, to’o mos ba eskola Cristal nian, no vizita sarani hotu iha Munisipíu idak – idak.
Presidente Ezekutivu Fundasaun Cristal Agostinho dos Santos Gonçalves, dehan illas sira ne’e, la’os Fundasaun no Estudante Cristal nian mesak de’it, maibé ida ne’e, partense ba sarani no povu Timoroan sira nian, liu –liu hirak ne’ebé nu’udar sarani katolika.
“Vizita illas ne’e, la’os partense ba ema ida nian, maibé sarani sira nian. Nain feto Aulixiadora, João Paulo Segundo, sarani hotu nian tanba ne’e, vizita ba munisipíu sira tenke reza hodi bele hetan domin, dame, paz atu hado’ok ita hotu husi hahalok aat sira. Hetan no hasoru illas sira iha dalan karik keta haluha kari netik ai – funan,” hato’o husi Presidente Ezekutivu Fundasaun Cristal liuhosi nia palestra hafoin misa iha Salaun Enkontru Cristal – Balide.
Intervensaun husi Magnifiku Reitor Instituto Superior Cristal, Sebastião Pereira, husu ba estudante sira ne’ebé partense ba Munisipíu ida – idak(munisipíu 14), inklui alumni sira hotu tenke akompãna, halo adorasaun no reza bainhira vizita ba ida – idak nia munisipíu.
Observasaun Time Timor nian, illas sira ne’e, iha loron dahuluk 12/10, hala’o vizita ba Munisipíu Aileu, tutan ba Ainaro, depois sei haleu munisipiu 14, inklui Atauro no Oecusse. Alende ne’e, iha tinan kotuk 2021, illas sira ne’e, konsege vizita ona munisipíu 7, iha ne’ebé eziste ona eskola Cristal nian. ****(TTM)
Discussion about this post